Aldrei fleiri skráð sig í borgaralega fermingu

420 ungmenni hafa skráð sig í borgaralega fermingu hjá Siðmennt í vor og hefur fjöldinn aldrei verið meiri. Bjarni Jónsson, framkvæmdastjóri félagsins, segir að aðsóknin hafi tvöfaldast á síðustu fimm árum.

Í fyrstu borgaralegu fermingunni hér á landi sem haldin var árið 1989 fermdust einungis sextán ungmenni. Fjölgunin hefur verið stöðug síðan og hafa nú 420 börn skráð sig í borgaralega fermingu í vor en fresturinn til að skrá sig rennur út í næstu viku.

Bjarni segir að ungmennin hafi aldrei verið fleiri. „Þetta er algert met. Þarna er um að ræða tíu prósent barna á fermingaraldri. Við höfum aldrei séð svona tölu áður og ég vil bara nefna það að umsóknir hafa tvöfaldast á fimm árum.“

Bjarni segir að samtímis þessari miklu fjölgun hafi athöfnunum fjölgað en þær fara nú fram á nokkrum stöðum á landinu. „Við verðum með athafnir á Ísafirði og Egilsstöðum þannig að það dreifist svolítið. Svo höfum við verið með á Akureyri og Reykjanesbæ og svo sex athafnir á höfuðborgarsvæðinu.

Ungmennin sækja námskeið einu sinni í viku yfir 11 vikna tímabil sem hefst í janúar og helgarnámskeið eru í boði fyrir börn utan af landi. Bjarni segir að þar undirbúi þau að verða fullorðin með öllum þeim réttindum og skyldum sem því fylgja. „Þarna er rætt um gagnrýna hugsun, siðfræði, smávegis um kynfræðslu, um eiturlyf og ýmislegt sem gagnlegt er fyrir börn á þessum aldri að heyra um og tileinka sér.“

Þá segir Bjarni að áhugi á starfsemi félagsins hafa aukist undanfarin ár og að það endurspeglist í auknum þátttakendafjölda í borgaralegri fermingu og auknum fyrirspurnum um aðrar borgaralegar athafnir.