Mennt er máttur

Menntun er gríðarlega mikilvæg og er eitt af grundvallar mannréttindum nútíma samfélags að mínu mati. Menntun eykur þróun og nýsköpun og býr þannig til fleiri tækifæri og starfsmöguleika. Menntun eykur gagnrýna hugsun og hjálpar einstaklingum að finna hvar áhugasvið þeirra liggur. Menntun er og hefur alltaf verið mikilvæg í okkar samfélagi. Í Safnahúsinu á Hverfisgötu er að finna ástarbréf frá árinu 1892 þar sem maður skrifar til konu sinnar og hvetur hana til að fara í skóla. Hann segir „Menntunin er lífsins ljós og þeim menntaða eru fleiri vegir færir en þeim ómenntaða”.

Þó það þætti fremur dramatískt að setja þetta fram á þann hátt að menntun sé lífsins ljós, þá á þetta ennþá við rúmum 100 árum seinna.

Háskólinn í Reykjavík leggur mikið upp úr því að vera nútímavæddur háskóli, það felst meðal annars í því að hvetja nemendur til nýsköpunar. Nýsköpun er ekki ný af nálinni þó ekki séu allir vissir um hvað orðið feli í sér. Nýsköpun er að hugsa út fyrir kassann og nýta þekkingu á nýjan hátt. Sífelldar nýjungar verða til á sviðum atvinnulífs og samfélags og er mikilvægt að fylgja því eftir og skapa þannig tækifæri. Mikilvægt er að hafa sérfræðiþekkingu innan háskólanna til þess að kenna nýjum kynslóðum nemenda þá þekkingu og þannig miðla henni áfram.

Ef sú þekking er ekki til staðar, dregst íslenskt samfélag aftur úr. Fjármagnsskortur háskólanna gerir það að verkum að ekki hefur verið hægt að fá nýja sérfræðiþekkingu inn í háskólanna á Íslandi.

Ísland gæti verið mjög ofarlega á sviði menntunar vegna smæðar og er það kostur fyrir samfélagið að nemendur stundi nám á Íslandi. Undirfjármögnun háskólanna er búin að vara í langan tíma og veldur því að einhversstaðar þarf að skera niður. Með því að skera niður innan háskólanna minnka gæði náms sem veldur því að Ísland mun dragast aftur úr nágrannaþjóðum sínum. Önnur leið til að spara ríkisfjármuni og viðhalda gæðum háskólanna væri að fækka nemendum en með því að gera það er bæði verið að fækka tækifærum nemenda hér á landi og gera menntun að forréttindum sem ekki væru í boði fyrir alla. Báðir valmöguleikarnir eru skref aftur á bak í íslenskum menntamálum og ættum við þá langt í land með að vera á pari við aðra norræna háskóla.

Við Íslendingar eigum það svolítið til að hugsa einungis um einn dag í einu og taka ákvarðanir eftir því en það er engu að síður mikilvægt að horfa til framtíðar og hugsa hvað best sé að gera til lengri tíma. Ef við skerum niður hjá háskólunum í dag, þá fáum við það margfalt í bakið eftir nokkur ár og þá verða vandamálin án efa orðin enn stærri en þau eru í dag.

Ég skora á stjórnmálaflokkana að setja fjármögnun háskólanna í forgang og huga að framtíðinni, því við nemendur erum jú framtíðin.



Greinin er hluti af átaki Stúdentafélag Háskólans í Reykjavík í samstarfi við LÍS - Landssamtök íslenskra stúdenta vegna fjármögnunar háskólastigsins í aðdraganda Alþingiskosninga 2017. Kassamerki átaksins er #kjóstumenntun.