Sjálfsmark Rúnars reyndist dýrt

Rúnar Alex Rúnarsson stóð í marki Nordsjælland í kvöld gegn SönderjyskE og varð fyrir því óláni að skora sjálfsmark. Hann fékk svo á sig annað mark í uppbótartíma og Nordsjælland varð af tveimur stigum.

Nordsjælland var komið í 2-0 er Rúnar Alex skoraði sjálfsmarkið tólf mínútum fyrir leikslok. Jöfnunarmarkið kom svo á fjórðu mínútu uppbótartíma. 2-2 sem var grátleg niðurstaða fyrir Rúnar og félaga.

Nordsjælland var með tveggja stiga forskot á toppi dönsku úrvalsdeildarinnar fyrir leikinn og er því í ansi fínum málum eftir tíu leiki þrátt fyrir þetta klúður.

Eggert Gunnþór Jónsson var í byrjunarliði SönderjyskE og lék allan leikinn. Hans lið er í áttunda sæti deildarinnar.