Bæjarstjórinn í Garði gagnrýnir seinagang umhverfisráðherra

Bæjaryfirvöld í Garði eru afar ósátt við þær tafir sem hafa orðið innan stjórnsýslunnar við að staðfesta nýtt aðalskipulag Keflavíkurflugvallar. Skipulagið hefur ekki verið staðfest þrátt fyrir að allir lögbundnir afgreiðslufrestir séu liðnir. Bæjarstjórinn segir dapurlegt að stjórnsýslan skuli ekki virka sem skyldi.

Framkvæmdir Kaupfélags Suðurnesja við fyrsta áfanga verslunarkjarnans Rósasels skammt frá Flugstöð Leifs Eiríkssonar áttu að hefjast fyrir rúmu ári. Þær hafa hins vegar tafist verulega og er ekki gert ráð fyrir að uppbyggingin fari af stað fyrr en í fyrsta lagi í haust. Ástæðan er sú að ekki hefur tekist að létta á kvöðum í skipulagi Keflavíkurflugvallar þannig að bæjaryfirvöld í Garði geti breytt aðalskipulaginu á svæðinu við Rósasel.

Magnús Stefánsson, bæjarstjóri í Garði, segir að tafirnar komi sveitarfélaginu, flugvallaryfirvöldum og þeim fjárfestum sem hafi hug á að byggja upp atvinnustarfsemi á svæðinu mjög illa.

„Við getum ekkert gert í okkar skipulagsmálum fyrr en búið er að staðfesta nýtt aðalskipulag fyrir Keflavíkurflugvöll. Þetta hefur tafist von úr viti. Fjárfestar bíða eftir að geta hafið uppbyggingu þarna. Það eru miklir hagsmunir undir fyrir marga,“ segir hann.

Magnús útskýrir að sveitarfélagið hafi nú beðið mánuðum saman eftir því að nýtt aðalskipulag flugvallarins verði staðfest, en það er forsenda þess að hægt verði að gera nauðsynlegar breytingar á aðalskipulagi Garðs á svæðinu við Rósaselstorg.

„Þar stendur hnífurinn í kúnni. Skipulagsstofnun tók sér tíma langt umfram lögbundinn afgreiðslufrest til að staðfesta nýtt aðalskipulag flugvallarins, en vísaði málinu loks til umhverfisráðherra í byrjun ársins. Ráðherra átti samkvæmt skipulagsreglugerð að afgreiða málið í mars. Nú er langt liðið á ágúst og ekkert hefur gerst. Nýjustu fregnir sem við fengum í lok júní voru að ráðuneytið myndi líklega ekki afgreiða málið fyrr en um mánaðamót ágúst og september. Nú er að bíða og sjá hvort það stenst.

Við erum mjög ósátt við þessar tafir og teljum dapurlegt að stjórnsýslan skuli ekki virka sem skyldi.“

Áform Kaupfélags Suðurnesja um að byggja Rósasel, á um tuttugu þúsund fermetra lóð við síðasta hringtorgið áður en komið er að flugstöðinni, voru kynnt í byrjun árs 2016. Framkvæmdum við fyrsta áfanga átti þá að ljúka á þessu ári og í kjölfarið hófst leit að fjárfestum að verkefninu.

Í ágúst í fyrra var skrifað undir viljayfirlýsingar við fjögur félög um rekstur í verslunarkjarnanum. Nettó, sem er í eigu Samkaupa, dótturfélags Kaupfélags Suðurnesja, myndi opna matvöruverslun, Olís reka þar bensínstöð og Subway, Pizza Hut, KFC, Taco Bell og Grill 66 veitingastaði.

Nú er búist við að framkvæmdir hefjist í haust. Í fyrsta áfanga er gert ráð fyrir 500 fermetra bensínstöð, verslun Nettó upp á þúsund fermetra og eitt þúsund fermetra veitinga- og þjónustuhluta. Áætlað er að framkvæmdir taki um tólf til sextán mánuði.