Palestínumenn sungu og dönsuðu af gleði í Jerúsalem

Palestínumenn flykktust aftur á Musterishæðina í Jerúsalem, sem múslimar kalla reyndar Haram al-Sharif, til þess að leggjast á bæn. Yfirvöld í Ísrael ákváðu að taka niður öryggishlið og öryggismyndavélar sem hafði verið komið þar upp til að fylgjast með Palestínumönnum í kjölfar þess að tveir ísraelskir lögreglumenn voru skotnir til bana á svæðinu.

Þegar hinni umdeildu öryggisgæslu var komið á hvöttu trúarleiðtogar Palestínumanna á svæðinu til sniðgöngu. Þótti þeim brot á réttindum múslima að þurfa að gangast undir öryggisleit til þess að sækja einn helgasta stað íslam heim.

Aðgerðir Ísraela urðu að miklu hitamáli. Fjöldamótmæli spruttu upp, múslimar báðu á bílastæðum utan við Musterishæðina og sjö misstu líf sitt í átökum.

Brottflutningur öryggistækjanna vakti mikla lukku og að því er BBC hermir mátti sjá Palestínumenn syngja og dansa af fögnuði fyrir utan svæðið áður en þeir gengu inn í al-Aqsa moskuna til bænahalds.

Menntamálaráðherra Ísraels, Naftali Bennett, sem er þó andstæðingur forsætisráðherrans Benjamíns Netanjahú, gagnrýndi ákvörðunina í gær. „Í stað þess að senda skýr skilaboð um yfirráð Ísraela sendum við skilaboð um að yfirráð okkar megi draga í efa.“

Ísraelar gera tilkall til Jerúsalemborgar allrar þótt alþjóðasamfélagið viðurkenni ekki yfirráð þeirra. Palestínumenn gera hins vegar tilkall til austurhluta borgarinnar en hún er höfuðborg Palestínu.