Tekjur Íslendinga: Skipstjórarnir moka upp peningunum

Skipstjórinn Guðlaugur Jónsson á Ingunni AK, er efstur á lista yfir tekjuhæstu sjómenn og útgerðarmenn Íslands í fyrra. Þetta kemur fram í Tekjublaði Frjálsar verslunar sem gefið var út nú í morgun. Guðlaugur er sagður hafa verið með 4,43 milljónir króna á mánuði.

Í öðru sæti er Albert Sveinsson, skipstjóri á Faxa RE, með 4,07 milljónir. Bergur Einarsson, skipstjóri á Hoffelli SU, er í næsta sæti með 4,04 milljónir.

Þá er Ingi Jóhann Guðmundsson, framkvæmdastjóri Gjögurs, í fjórða sæti með 3,9 milljónir króna. Hann er sá eini af efstu tíu, sem ekki er skipstjóri og flestir eru þeir á uppsjávarskipum.

Í fimmta sæti er Daði Þorsteinsson, skipstjóri á Aðalsteini Jónssyni, með rétt rúmar þrjár og hálfa milljón króna á mánuði. Guðmundur H. Guðmundsson, skipstjóri í Vestmannaeyjum, er næstur með 3,36 milljónir króna og Tómas Kárason, skipstjóri á Beiti NK, er í sjöunda sæti með 3,26 milljónir.

Hálfdán Hálfdánarson, sem einnig er titlaður skipstjóri á Beiti NK, er í áttunda sæti með 3,22 milljónir og Hjörvar Hjálmarsson, skipstjóri Neskaupstað, er níundi með 3,18 milljónir. Í því tíunda er Jón Axelsson, skipstjóri á Álsey VE, með 3,16 milljónir króna.

Vert er að taka fram að könnun Frjálsar verslunar byggir á útsvari eins og það birtist í álagningarskrám. Í einhverjum tilvikum kann að vera að skattstjóri hafi áætlað tekjur. Þá þurfa tölurnar ekki að endurspegla föst laun í fyrra þar sem allar tekjur ákvarða útsvar. Þær gætu verið fyrir setu í nefndum, önnur aukastörf og vegna kaupréttarsamninga. Jafnvel hafa margir tekið út séreignarsparnað.