Sex gullverðlaun í sundi og frjálsum

Íslenska íþróttafólkið vann til 14 verðlauna á Smáþjóðaleikunum í San Marinó í gær. Íslendingar fengu sex gull, sjö silfur og eitt brons.

Ísland er áfram í 2. sæti á verðlaunatöflunni með 19 gull, 11 silfur og 11 brons. Lúxemborg trónir á toppnum með 62 verðlaunapeninga. Kýpur er svo í 3. sæti með 42 verðlaunapeninga.

Verðlaun Íslands í gær:

Sund

Bryndís Rún Hansen fékk gullverðlaun í 50 metra skriðsundi á tímanum 26,22 sekúndum.

Hrafnhildur Lúthersdóttir fékk gullverðlaun í 100 metra bringusundi á tímanum 1:08,84.

Bryndís Rún og Hrafnhildur voru einnig, ásamt Eygló Ósk Gústafsdóttur og Ingu Elínu Cryer, í íslensku sveitinni sem vann til gullverðlauna í 4x100m fjórsundi. Þær syntu á 4:10,50, voru 13 sekúndum á undan Kýpur og settu mótsmet.

Íslenska sveitin í 4x100 metra fjórsundi karla, Davíð Hildiberg Aðalsteinsson, Viktor Máni Vilbergsson, Ágúst Júlíusson og Aron Örn Stefánsson, unnu til silfurverðlauna. Þeir syntu á tímanum 3:47,67 og settu landsmet.

Viktor Máni vann til silfurverðlauna í 100 metra bringusundi á tímanum 1:03,73. 

Eygló Ósk vann til bronsverðlauna í 200 metra skriðsundi á tímanum 2:04,24.

Frjálsar íþróttir

Arna Stefanía Guðmundsdóttir kom fyrst í mark í 400 metra grindahlaupi á tímanum 59,14 sekúndum. Hún var tæpum þremur sekúndum á undan næsta keppanda.

Guðni Valur Guðnason vann til gullverðlauna í kringlukasti. Hann kastaði 59,98 metra.

Arndís Ýr Hafþórsdóttir vann til gullverðlauna í 10 km hlaupi á tímanum 36:59:69.

María Rún Gunnlaugsdóttir vann til silfurverðlauna í langstökki þegar hún stökk 5,53 metra.

Guðbjörg Jóna Bjarnadóttir vann til silfurverðlauna í 400 metra hlaupi á tímanum 55,72 sekúndum.

Ívar Kristinn Jasonarson vann til silfurverðlauna í 400 metra hlaupi á tímanum 48,28 sekúndum. Hann vann einnig til silfurverðlauna í 400 metra grindahlaupi á tímanum 52,67 sekúndum.

Ásdís Hjálmsdóttir vann til silfurverðlauna í kúluvarpi með kasti upp á 15,39 metra.