Leikhópurinn Perlan heiðrar Sigríði Eyþórsdóttur

Leikhópurinn Perlan æfir nú stíft fyrir sýningu á stóra sviði Borgarleikhússins þar sem ævistarf Sigríðar Eyþórsdóttur, stofnanda hópsins, verður heiðrað.

Sigríður Eyþórsdóttir stofnaði Perluna fyrir 34 árum en þegar hún féll frá á síðasta ári tók dóttir hennar Bergljót Arnalds við starfinu til bráðabirgða og ákvað að leiða hópinn í gegnum þessa sýningu.

„Það var skorað á mig og mér var sagt að annað hvort myndi hópurinn verða lagður niður eða að ég myndi treysta mér að taka við. Ég lofaði að taka við í vetur og standa að þessari heiðurssýningu en þau eru svo einstök og yndisleg og ástrík og kærleiksrík að ég held að það verði svolítið erfitt að sleppa af þeim tökunum," segir Bergljót.



Heiðursverkið verður sýnt á stóra sviðinu í Borgarleikhúsinu á fimmtudaginn en æfingar hafa staðið yfir í allan vetur. Páll Óskar Hjálmtýsson sem hefur leikið með Perlunni í forföllum verður kynnir og ætlar forseti Íslands Guðni Th. Jóhannesson að mæta ásamt fjölskyldu sinni. Sigfús Sveinbjörn Svanbergsson, sem starfað hefur með hópnum frá upphafi, eða í 34, ár og mun bregða sér í ýmis hlutverk á fimmtudaginn og segir það vera meiriháttar að taka þátt.

Þá mun Guðrún Ósk Ingvarsdóttir túlka rigningardans þar sem hún svífur um sviðið með regnhlífar. Hún segir rigningu í sérstöku uppáhaldi.

Atriði Hreins Hafliðasonar er frumsamið og afsprengi vinnu í spunatíma. Þá syngur hann dúett með Ladda sjálfum og segist mjög spenntur fyrir frumsýningunni.

„Þetta gengur bara allt saman vel og er frábært á síðasta degi núna. Þetta verður frábært," segir Hreinn.