Varað við mikilli úrkomu á landinu

Veðurstofan varar við talsverðri eða mikilli úrkomu á landinu á morgun, föstudag, einkum á Austfjörðum og Suðausturlandi austan Öræfa.

Í tilkynningu frá Veðurstofunni segir að úrkoman sem falli verði að öllum líkindum rigning eða slydda á láglendi en snjókoma til fjalla. Því sé útlit fyrir versnandi ferðaveðri á þessum slóðum og er fólk hvatt til þess að fylgjast vel með veðurspám og færð á vegum.

Á laugardag mun svo heldur hlýna í veðri og dregur þá úr úrkomu. Frá hádegi á laugardegi og fram á sunnudag má þó búast við talsverðri úrkomu austan til á landinu með tilheyrandi leysingum. Það má því gera ráð fyrir auknu rennsli í ám og lækjum á svæðinu og eru staðbundin flóð líkleg.

Veðurhorfur næstu daga:

Norðaustan 13-23 m/s, hvassast suðaustantil, undir Eyjafjöllum og í Öræfum, og víða hvassir vindstrengir við fjöll. Sums staðar dálítil él fyrir norðan, rigning með köflum suðaustantil, en þurrt að mestu vestanlands.

Bætir í úrkomu á morgun, talsverð eða mikil rigning eða slydda austanlands upp úr hádegi, en snjókoma til fjalla. Annars úrkomuminna. Austan 15-23 annað kvöld, hvassast á annesjum norðantil og á Vestfjörðum með aukinni ofankomu. Hiti 0 til 8 stig að deginum, mildast SV-til.

Á laugardag:

Austan 10-18 m/s og rigning með köflum, en mikil rigning austantil. Hægari síðdegis og úrkomuminna. Hlýnandi veður.

Á sunnudag:

Austlæg átt, 8-15 m/s, hvassast á annesjum. Rigning eða talsverð rigning suðaustan- og austanlands, en annars smá skúrir. Hiti 5 til 15 stig, hlýjast vestanlands.

Á mánudag:

Austlæg átt 5-10 m/s og úrkomulítið, en hvessir með rigningu SA-til um kvöldið. Hiti breytist lítið.

Á þriðjudag:

Austlæg átt. Rigning sunnantil, en annars skýjað með köflum og sums staðar skúrir. Hiti 8 til 15 stig.

Á miðvikudag:

Útlit fyrir norðaustanátt með kólnandi veðri. Víða skúrir, en þurrt og bjart að mestu suðvestantil.