Máni tekur Úlf og Valskonur í gegn: „Öll stjórn á Valsliðinu var þeim ekki til sóma“

Valur er í vandræðum í Pepsi-deild kvenna í fótbolta en liðið er með þrjú stig eftir þrjá leiki sem er versta stigasöfnun liðs sem spáð hefur verið Íslandsmeistaratitlinum frá stofnun tíu liða deildar árið 2008.

Valsliðið fékk vænan skell í Kópavogi á miðvikudagskvöldið þegar það steinlá á móti Breiðabliki, 3-0. Það tapaði fyrir Þór/KA, 1-0, í fyrstu umferðinni en pakkaði Eyjakonum saman, 4-0, í annarri umferð deildarinnar.

Úlfur Blandon, þjálfari Vals, mætti ekki til viðtals eftir leikinn en fréttamenn á staðnum sáu á eftir honum rjúka út af velinum án þess að ræða við nokkurn mann þó til þess sé ætlast af öllum þjálfurum deildarinnar.

Valsliðið er með 200 leikja konur innan sinna raða eins og Málfríði Ernu Sigurðardóttur, Laufey Björnsdóttur, Pálu Marie Einarsdóttur, Söndru Sigurðardóttur og svo auðvitað landsliðsfyrirliðann Margréti Láru Viðarsdóttur.

Engin þeirra mætti til viðtals til að svara fyrir þennan skell. Sú sem mætti var Hrafnhildur Hauksdóttir, 21 árs gamall vinstri bakvörður Valsliðsins, sem stóð sig vel í viðtölum.

Í Pepsi-mörkum kvenna velti Helena Ólafsdóttir því fyrir sér hvort pressan væri strax að buga Úlf Blandon en honum er ætlað að skila Íslandsmeistaratitlinum á Hlíðarenda.

„Það er ekki hægt að segja að pressan sé of mikil. Eftir næstu umferð verður Valur búið að mæta fjórum af fimm liðunum sem það ætlaði að keppa við um Íslandsmeistaratitilinn,“ sagði Máni Pétursson, sérfræðingur Pepsi-marka kvenna, í þætti gærkvöldsins.

„Ég get ekki trúað því að pressan sé ekki eins mikil og í karlaboltanum í Kópavogi þar sem menn eru látnir fara eftir tvo leiki,“ bætti hann við og hló.

Máni var þó fljótur að hætta að brosa þegar hann afgreiddi Úlf og reynslumestu leikmenn Vals fyrir að svara ekki fyrir þetta tap í Kópavoginum.

„Þetta er algjörlega óboðlegt. Öll stjórn á þessu Valsliði í leiknum var þeim ekki til sóma. Úlfur mætir ekki í viðtal. Hann er þjálfari og höfuð þessa liðs. Hann á auðvitað mæta og svara fyrir þetta. Það er bara eðlilegt,“ sagði hann.

„Allt í lagi. Þjálfarinn kemur ekki í viðtal. Það getur verið góð ástæða fyrir því. Stundum er aðstoðarþjálfarinn sendur í viðtal og stundum koma leikmenn bara í viðtöl. Kannsi var eitthvað þarna á bakvið.“

„En í þessu liði er landsliðsfyrirliðinn og svo ertu með Málfríði Ernu og Söndru en ákveðið er að senda einn ungliðann í viðtal. Ég velti fyrir mér hvaða stjórnun inn í klefa er það að senda unga manneskju í viðtal eftir svona leik þar sem liðið er algjörlega búið að skíta á sig.“

„Þarna á að senda Margréti Láru eða einhvern sem er foringi í þessu liði til að svara fyrir í viðtölum eftir svona frammistöðu. Í staðinn er sendur ungur leikmaður og hverju átti hún nú að fara að svara? Þetta var ekki á hennar ábyrgð,“ sagði Máni Pétursson.

Umræðuna má sjá í spilaranum hér að ofan.