Myglan eyðilagði starfsmóralinn í velferðarráðuneytinu

Þriðja árið í röð er Sýslumaðurinn á höfuðborgarsvæðinu í neðsta sæti á lista yfir Stofnun ársins 2017. Lögreglan á höfuðborgarsvæðinu hefur á þessum sömu árum alltaf verið í næstneðsta sæti. Báðar stofnanirnar eru á lista yfir fyrirtæki með 50 starfsmenn eða meira.

Stofnun ársins 2017 var valin með þeim hætti að spurningalisti var lagður fyrir starfsfólk um 200 stofnana þar sem það var innt eftir mati á innra starfsumhverfi stofnunar sinnar. Í valinu er spurt út í þætti er varða stjórnun, starfsanda, launakjör, vinnuskilyrði, sveigjanleika í vinnu, sjálfstæði í starfi, ímynd stofnunar, ánægju og stolt og jafnrétti.

Stofnanir ársins eru þrjár: Reykjalundur er sigurvegari í flokki stofnana með 50 starfsmenn eða fleiri. Menntaskólinn á Tröllaskaga er stofnun ársins í flokki með starfsmenn á bilinu 20-49 talsins. Í flokki stofnana þar sem starfsmenn eru færri en 20 bar Persónuvernd sigur úr býtum.

Ekki náðist tal af sýslumanninum í Reykjavík, en Sigríður Björk Guðjónsdóttir, lögreglustjóri á höfuðborgarsvæðinu, segir laun helsta óánægjuþáttinn hjá stofnuninni. „Ef þú tekur það út og berð það saman við önnur lögreglulið þá sérðu að það er mun meiri óánægja með laun hjá okkur. Það dregur okkur niður,“ segir Sigríður Björk.

Hún segir hins vegar hægt að vinna í mjög mörgum þáttum til að bæta aðstæður starfsmanna lögreglunnar. „Við ætlum að fara í mælingar, annaðhvort á mánaðar fresti eða tveggja mánaða fresti,“ segir Sigríður og leggur áherslu á að það verði unnið betur með mannauðsþáttinn. Hún segir líka unnið í því að styrkja stjórnendur enda hafi komið fram óánægja með stjórnendur, ekki bara með yfirstjórn heldur líka millistjórnendur.

Utanríkisráðuneytið kom verst allra ráðuneyta út úr mælingunni fyrir ári. Ráðuneytið fer hins vegar núna úr sæti 72 upp í sæti 59 á lista yfir stofnanir með 50 starfsmenn eða fleiri. Lilja Alfreðsdóttir, fyrrverandi utanríkisráðherra, segir að þegar niðurstöðurnar voru birtar í fyrra hafi strax verið settur upp hópur innan ráðuneytisins. „Þeir skiluðu nokkrum niðurstöðum,“ segir Lilja og bætir við að ein þeirra hafi verið sú að það hafi skort á gagnsæi varðandi stöðuveitingar. „Ég brást við því með því að allir póstar sem voru lausir voru auglýstir fyrr en venjulega hefur verið gert,“ segir Lilja. Þetta hafi verið nýtt. Fólki hafi síðan verið gert að rökstyðja af hverju það ætti að fá þær stöður sem það sóttist eftir. 

Í mælingunni í ár kemur velferðarráðuneytið út verst allra ráðuneyta. Það er í sæti 81 af 86 stofnunum. Eygló Harðardóttir, fyrrverandi félagsmálaráðherra, skýrir þessa niðurstöðu með því að upp hafi komið mygla í húsnæði ráðuneytisins. Það hafi því þurft að flytja starfsemi ráðuneytisins úr Hafnarhúsinu í mun þrengra húsnæði. „Þetta var mjög mikið álag,“ segir Eygló og bætir við að það sé mikilvægt að búa vel að starfsfólkinu og hún vonist til þess að hægt verði að finna varanlegt húsnæði.