„Mestu nornaveiðar“ í sögu Bandaríkjanna

Donald Trump, forseti Bandaríkjanna, segir rannsókn á afskiptum Rússa af forsetakosningum og mögulegu samstarfi framboðs hans við yfirvöld í Moskvu vera mestu nornaveiðar Bandaríkjanna sem beinast gegn stjórnmálamanni.

Hann staðhæfir að fjölmargir ólöglegir atburðir hafi átt sér stað innan forsetaframboðs Hillary Clinton og í stjórnartíð Barack Obama. Þá hafi enginn sérstakur saksóknari verið skipaður.

Aðstoðardómsmálaráðherra Bandaríkjanna skipaði sérstakan saksóknara í gær til þess að taka við stjórn áðurnefndar rannsóknar. Trump vissi ekki af skipuninni fyrr en búið var að skrifa undir hana.

(Fyrra tístinu var eytt vegna stafsetningarvillu og sett inn aftur.)

With all of the illegal acts that took place in the Clinton campaign & Obama Administration, there was never a special counsel appointed!

— Donald J. Trump (@realDonaldTrump) May 18, 2017

With all of the illegal acts that took place in the Clinton campaign & Obama Administration, there was never a special councel appointed!

— Donald J. Trump (@realDonaldTrump) May 18, 2017

This is the single greatest witch hunt of a politician in American history!

— Donald J. Trump (@realDonaldTrump) May 18, 2017

Dómsmálaráðuneyti Bandaríkjanna hefur skipað Robert Mueller sem sérstakan saksóknara og mun hann taka við stjórn rannsóknarinnar. Aðstoðardómsmálaráðherra Bandaríkjanna tók þá ákvörðun í gærkvöldi eftir afdrifaríka daga þar sem fregnir bárust af mögulegum afskiptum Donald Trump af rannsókninni.

Pressan hafði þá verið mikil og sérstaklega eftir að Trump viðurkenndi að hann hefði rekið James Comey, fyrrverandi yfirmann FBI, vegna Rússarannsóknarinnar. Í þessari viku birtust svo fréttir um minnisblöð Comey frá fundum hans og Trump, þar sem Comey sagði Trump hafa beðið sig um að hætta rannsókninni.

Trump vissi ekki af skipun saksóknara

Rod Rosenstein, aðstoðardómsmálaráðherra, er yfir rannsókninni vegna þess að Jeff Sessions, dómsmálaráðherra, sagði sig frá henni eftir að hann sagði ósatt frá samskiptum sínum og Sergey Kislyak, sendiherra Rússlands, á meðan að kosningabaráttan var enn yfirstandandi.

Michael Flynn neyddist til að segja af sér sem þjóðaröryggisráðgjafi Trump eftir að hann sagði einnig ósatt frá samskiptum sínum og Kislyak.

Skipun Mueller mun líklega þagga í mörgum gagnrýnisröddum, en hann er sagður vera óháður og mun njóta ákveðins frelsis frá bæði ráðuneytinu og Hvíta húsinu. Samkvæmt frétt New York Times vissi Trump sjálfur ekki af skipuninni fyrr en eftir að Rosenstein hafði skrifað undir hana.

Trump mun hafa kallað helstu ráðgjafa sína á fund sinn og sagðist hann vilja „svara fyrir sig“. Þá mun Jared Kushner, tengdasonur Trump, hafa slegið á svipaða strengi. Flestir aðrir á fundinum studdu þó að taka upp „sáttatón“.

Sjá einnig: Versti dagur forsetatíðar Trump.

Michael Flynn og aðrir starfsmenn Donald Trump höfðu minnst átján sinnum samskipti við rússneska embættismenn og aðra með tengsl við stjórnvöld Rússlands á sjö mánaða tímabili fyrir forsetakosningarnar í fyrra. Þessi samskipti eru til rannsóknar hjá Alríkislögreglu Bandaríkjanna og þingnefndum sem rannsaka afskipti Rússa af kosningunum og mögulegt samstarf framboðs Trump við Rússa.

Heimildarmenn Reuters segja minnst sex símtöl á milli Michael Flynn, fyrrverandi varnarmálaráðherra Trump, og Sergey Kislyak, sendiherra Rússlands, vera til rannsóknar.

Engar sannanir fyrir glæpsamlegu atferli

Fjórir af heimildarmönnum Reuters, sem eru fyrrverandi og núverandi embættismenn, segja Flynn og Kislyak hafa rætt oftar saman eftir kosningarnar þann 8. nóvember. Meðal annars hafi þeir rætt hvernig hægt væri að koma á laggirnar samskiptaleið á milli Trump og Vladimir Putin, forseta Rússlands, sem færi fram hjá öryggiskerfum og skrifinnsku ríkjanna tveggja.

Hins vegar segja þeir að þeir hafi ekki séð sannanir fyrir glæpsamlegu atferli né samstarfs á milli framboðsins og Rússlands.

Leyniþjónustur og öryggisstofnanir Bandaríkjanna segja ljóst að yfirvöld Rússlands hafi haft afskipti af forsetakosningunum í fyrra og að markmið þeirra hafi verið að koma í veg fyrir að Hillary Clinton myndi vinna. Til þess hafi þeir meðal annars beitt tölvuárásum og áróðri.

Áhersla lögð á Flynn og Manafort

Auk Michael Flynn, beina rannsakendur einnig sjónum sínum að Paul Manafort, fyrrverandi kosningastjóra Trump. Mikil áhersla mun vera lögð á þá tvo samkvæmt frétt NBC og er rannsóknin skilgreind sem sakamálarannsókn. Stefnur hafa verið gefnar út og gagna hefur verið krafist undanfarna mánuði og meðal þess sem FBI, með hjálp fjármálaráðuneytis Bandaríkjanna og leyniþjónustu, er að skoða eru millifærslur, samskipti og viðskiptatengsl.

Einn fyrrverandi starfsmaður FBI segir þó að rannsóknin hafi orðið fyrir skaða þegar tilvist hennar lak til fjölmiðla í fyrra.

Flynn skráði sig nýverið sem útsendara Tyrklands eftir þrýsting frá Dómsmálaráðuneytinu. Hann hafði fengið um hálfa milljón dala frá yfirvöldum þar á meðan á kosningabaráttunni stóð. Hann hefur einnig lent í vandræðum fyrir að hafa ekki greint hernum frá greiðslum sem hann fékk frá yfirvöldum í Rússlandi árið 2015.

Samkvæmt New York Times vissu Trump-liðar þó af þvi að Flynn væri til rannsóknar vegna peninganna sem hann fékk frá Tyrklandi, þegar hann var ráðinn.

Starfandi yfirmaður FBI, Andrew G. McCabe, staðfesti í síðustu viku að „mjög þýðingamikil“ rannsókn stæði yfir. NYT segir að rannsakendur virðist hafa gefið verulega í á undanförnum vikum.

Vilja enn rannsóknarnefnd

Þrátt fyrir að Mueller hafi nú tekið við rannsókninni sem sérstakur saksóknari kalla demókratar enn eftir sjálfstæðri rannsóknarnefnd innan þingsins. Þingmaðurinn Adam Schiff segir að slík nefnd myndi rannsaka afskipti Rússa af kosningunum. Hvað þeir gerðu og hvernig eigi að bregðast við því í framtíðinni.