Líklega ekki reykt í húsinu

„Við erum að hafa það huggulegt í Luton núna. Fljúgum í kvöld og verðum líklega komnir upp á hótel klukkan eitt í nótt,“ segir Óskar Bjarni Óskarsson, þjálfari Valsmanna, sem lögðust í langt ferðalag í gær en áfangastaðurinn var Turda í Rúmeníu.

Á morgun munu Valsmenn spila síðari leikinn gegn rúmenska liðinu í undanúrslitum í Áskorendakeppni Evrópu. Þangað fara Valsmenn með átta mörk í farteskinu. Hlíðarendapiltar hafa daginn í dag til þess að hrista af sér ferðalagið og koma sér í rétta gírinn fyrir leikinn mikilvæga.

Lítil gryfja í litlum bæ

„Við vitum ekki mikið um staðinn en þetta ku vera 50 þúsund manna bær. Það er bara karlalið í þessum bæ og er aðeins sjö ára gamalt. Þetta er því ungt félag en það er peningur í þessu hjá þeim enda atvinnumannalið. Það vantaði tvo eða þrjá leikmenn hjá þeim síðast. Einn sterkur á samt hugsanlega að snúa til baka í seinni leiknum,“ segir Óskar Bjarni en heimavöllur rúmenska liðsins er ekki mjög stór en er þó gryfja þar sem er von á látum.

„Þetta er lítil gryfja segja þeir. Ein stúka á móti bekkjunum og svo svalir fyrir ofan mörkin. Þeir segja að það verði læti þarna og að þetta sé alvöru heimavöllur.“

Eiga ekki von á góðu

Einhverjir frá rúmenska félaginu létu hafa það eftir sér eftir fyrri leikinn að Valsmenn mættu búast við látum og alvöru heimadómgæslu í þessum leik. Valsmönnum var tjáð að þeir ættu ekki von á góðu.

„Við skulum vona að svo verði ekki. Það verður þriðja besta dómarapar Tékka að dæma og ég hef ekki miklar áhyggjur af þeim. Eftirlitsmaðurinn er reyndar frá Kýpur og það verður pottþétt eitthvert bíó. Við verðum að vera andlega tilbúnir í þetta verkefni. Hvernig við stöndumst áhlaup þeirra í leiknum og það mótlæti sem getur mætt okkur.“

Þetta er þriðja rimma Valsmanna í Balkanlöndunum í keppninni og þó svo sumir telji að enn sé reykt í þessum íþróttahúsum sem eru í litlum bæjum í þessum löndum, og stubbum sé kastað í leikmenn, þá virðast þeir tímar vera liðnir.

Guttarnir þekkja ekki reykingar

„Okkar kynslóð man vel eftir þeim tíma en þessir ungu drengir í liðinu í dag hafa aldrei verið í kringum reykingar og skilja ekkert í þessum sögum sem við getum sagt þeim. Þeir skilja ekkert í því er við förum út að borða og svona að það sé reykt út um allt. Sem betur fer er þó ekki verið að reykja í íþróttahúsunum,“ segir Óskar Bjarni en þó svo að hans menn lendi í einhverju mótlæti trúir hann að þetta átta marka forskot úr fyrri leiknum muni duga Valsmönnum til þess að komast í úrslitaleikina.

„Þó svo að heimavöllur gefi aðeins þá tel ég að ef við erum tilbúnir í allt sem getur gerst, þá munum við standa í lappirnar. Við ætlum að sækja til sigurs. Við erum búnir að lenda í ýmsu í þessari keppni og komnir með fína reynslu. Við vitum hvað við getum og það er sjálfstraust í liðinu. Ef við hugsum um litlu hlutina, hlaupum til baka og spilum fínan varnarleik þá munum við taka þetta.“

Ástandið á liðinu gott

Það er búið að vera mikið álag á Valsliðinu síðustu vikur. Það er á fullu í úrslitakeppninni hér heima og þess á milli á ferð og flugi í Evrópukeppninni. Það er því nánast ekkert æft og aðeins spilað.

„Það er búið að vera ótrúlegt álag og miðað við það er ástandið á mannskapnum furðulega gott. Við getum auðvitað ekki hvílt alla jafn mikið og það sést stundum á okkur að við erum þreyttir. Þetta eru samt allt úrslitaleikir og við förum langt á andlega hlutanum. Menn eru að vinna úrslitaleiki og styrkjast við hverja raun.“