Eigendur Brims ætla að leita til dómstóla vegna Ufsabergsdeilunnar

Guðmundur Kristjánsson, forstjóri Brims, segir sjávarútvegsfyrirtækið ætla að leita til dómstóla til að fá hnekkt niðurstöðu atvinnuvega- og nýsköpunarráðuneytisins um að hafna beiðni um skipan rannsóknarmanna svo rannsaka mætti tiltekna þætti í starfsemi Vinnslustöðvarinnar í Vestmannaeyjum (VSV) og meðferð eigin fjár í tengslum við samruna VSV og útgerðarinnar Ufsabergs sem samþykkt var í október 2014.

Fjallað var um nýjustu deilu eigenda Brims annars vegar og meirihlutaeigenda VSV hins vegar í Markaðnum, fylgiriti Fréttablaðsins um viðskipti og efnahagsmál, í gær. Lýsti Guðmundur þar undrun sinni á niðurstöðunni, sem ráðuneytið sendi forsvarsmönnum Brims og VSV í síðustu viku, og sagði það umhugsunarefni hvort minnihlutavernd væri enn við lýði í hlutafélögum hér á landi. Brim, sem er í eigu Guðmundar og Hjálmars Kristjánssona, á 33 prósenta hlut í VSV en átök bræðranna og meirihlutans í Eyjum eiga sér um tíu ára sögu. Halda bræðurnir því fram að raunverulegur tilgangur samruna VSV og Ufsabergs, sem Hæstiréttur samþykkti í júní í fyrra, hafi verið að þynna út hlutafjáreign og völd minnihlutaeigenda VSV.

„Upphaf málsins má rekja til ársins 2011, þegar meirihluti eigenda VSV kom því til leiðar að þynna út eignarhlut aðila tengdra Brimi hf. með því að virkja atkvæðarétt eigin bréfa VSV. […] Með því móti tókst meirihlutanum í krafti leynilegs hluthafasamkomulags að þvinga fram aukinn meirihluta, eða 67% atkvæðavægi sem þurfti til að samþykkja samruna VSV og Ufsabergs útgerðar ehf. Slíkur meirihluti var ekki til staðar fyrir sölu eiginbréfa VSV til aðila innan hins leynilega hluthafasamkomulags,“ segir í tilkynningu sem Guðmundur sendi fjölmiðlum í gær.