Fyrir­hugað flug­fé­lag vekur at­hygli en engar leyfis­um­sóknir liggja fyrir

Fréttastofa náði tali af einum af aðstandendum vefsins sem vildi ekki koma fram undir nafni og taldi ekki tímabært að tjá sig því verkefnið væri á frumstigi. 

Að því er fram kemur á vef verkefnisins er Yelo Air íslenskt flugfélag og einkaframtak. Þar kemur fram að það sé viljandi gert að greina ekki frá flugleiðum eða viðskiptaáformum að svo komnu fyrr en fjármögnun, mönnun og leyfi liggja fyrir.

Það er enda umfangsmikið ferli að koma nýju flugfélagi af stað. Samkvæmt lögum þarf leyfi Samgöngustofu til að starfrækja loftfar í ábataskyni hér á landi og aðeins handhafar flugrekstrarleyfis mega flytja farþega, farm eða póst í slíkum rekstri. Til að fá slíkt leyfi þarf félag meðal annars að hafa höfuðstöðvar á Íslandi, gilt flugrekandaskírteini, aðgang að einu eða fleiri loftförum og uppfylla skilyrði um íslenskt eignarhald og raunverulega stjórn.

Kröfurnar snúa ekki heldur bara að pappírsvinnu. Gert er ráð fyrir að rekstraraðili hafi nægilegt og hæft starfsfólk miðað við umfang starfseminnar, auk ábyrgðarmanns og tilnefndra ábyrgðaraðila á lykilsviðum eins og flugrekstri, þjálfun áhafna, starfsmanna sem þjónusta flugvélar og lofthæfi.