Íslandsbanki dæmdur til að greiða slökkviliðinu 167 milljónir

Hæstiréttur Íslands hefur dæmt Íslandsbanka til að greiða Slökkviliði höfuðborgarsvæðisins 167 milljónir króna. Íslandsbanki hafði áður verið sýknaður af Héraðsdómi Reykjavíkur vegna málsins sem varðaði lánssamninga.

Slökkviliðið og Íslandsbanki, sem þá héti Glitnir, gerðu með sér þrjá lánssamninga á árunum 2001 til 2005. Slökkviliðið höfðaði mál gegn Íslandsbanka og hafði annars vegar uppi fjárkröfu vegna tveggja lánssamninga sem gerðir höfðu verið upp með nýjum lánssamningi við Íslandsbanka árið 2011 og hins vegar krafðist slökkviliðið viðurkenningar á rétti sínum til að skuldajafna kröfu á hendur Glitni hf. við lánssamningi milli slökkviliðsins og Íslandsbanka vegna þriðja lánssamningsins sem hann hafði gert upp við Glitni árið 2008.

Taldi slökkviliðið að hinir upprunalegu lánssamningar hefði verið í íslenskum krónum og bundnir við gengi erlendra mynta með ólögmætum hætti.

Í dómi Hæstaréttar var vísað til þess að þótt slökkviliðið hafi getað tekið lánin út í áföngum hefði ekki verið tiltekið í lánssamningunum að hver lánshluti yrði sjálfstætt lán né vísað til þess að um rammasamning eða lánalínu væri að ræða.

Var því talið að líta bæri á hvern lánssamning sem sjálfstæða lánsskuldbindinga. Þá var talið m.a. með vísan til þess að báðir aðilar hefðu uppfyllt meginskyldur sínar samkvæmt samningunum með greiðslum í íslenskum krónum að lánssamningarnir hefðu verið bundnir ólögmætri gengistryggingu.

Enn fremur var deilt um hvort Íslandsbanki gæti á grundvelli endurútreiknings lánanna gert kröfu um aðra og hærri vexti en gert hefði verið ráð fyrir á grundvelli samningana. Var talið með vísan til heildarmats á öllum aðstæðum stæði það Íslandsbanka nær að bera þann vaxtamun sem hefði hlotist af hinni ólögmætu gengistryggingu.

Þá var viðurkenndur fyrrgreindur skuldajöfnunarréttur slökkviliðsins með vísan til ákvörðunar Fjármálaeftirlitsins frá 14. október 2008 um ráðstöfun eigna og skulda Glitnis.

Íslandsbanki var dæmdur til að greiða slökkviliði höfuðborgarsvæðisins tvær milljónir króna í málskostnað í héraði og fyrir Hæstarétti.