Guðni Valur tók silfrið á Kanarí

Kringlukastarinn Guðni Valur Guðnason, ÍR, lenti í 2. sæti í U-23 ára flokki á Vetrarkastmóti Evrópu sem fer fram á Kanaríeyjum um helgina.

Guðni Valur, sem er 21 árs, tryggði sér silfurverðlaunin með því að kasta kringlunni 59,33 metra í sínu síðasta kasti.

Alin Alexandru Firdirica frá Rúmeníu vann gullið með kasti upp á 59,62 metra.

Guðni Valur gerði ógilt í fyrstu tveimur köstum sínum. Í þriðju tilraun kastaði hann 58,23 metra. Næsta kast var svipað langt, eða 58,20 metrar.

Fimmta kast Guðna Vals var ógilt en það sjötta tryggði honum silfrið eins og áður sagði.