Rætt um að bæta merkingar og setja upp hraðamyndavélar á Grindavíkurvegi

Kristín María Birgisdóttir, forseti bæjarstjórnar Grindavíkurbæjar, segir að fundir sem samráðshópur um bættari og öruggari Grindavíkurveg hafi átt með annars vegar Jóni Gunnarssyni, samgönguráðherra, og hins vegar Benedikt Jóhannessyni, fjármálaráðherra,í morgun hafi verið góðir. Hún hafi skynjað mikinn vilja hjá ráðherrunum til þess að ráðast í úrbætur í veginum þó ekki hafi fengist nákvæm svör varðandi það hvað verði gert.

Ítarlega hefur verið fjallað um slæmt ástand Grindavíkurvegar síðustu misserin en tvö banaslys hafa orðið á veginum það sem af er ári. Þá hafa níutíu önnur umferðarslys á seinustu árum aukið óöryggi vegfarenda sem aka Grindavíkurveg auk þess sem umferð um veginn hefur aukist um allt að 60 prósent frá árinu 2010. Margoft hefur verið krafist úrbóta á veginum. Í liðinni viku fundaði samráðshópurinn með Vegagerðinni og nú var komið að ráðherrunum. 

„Við finnum alveg meðbyr með þessu þó svo að við höfum ekki fengið skýr svör um að þetta verði svona og svona þar sem það á eftir að afgreiða þetta en samgönguráðherra sagði til að mynda að hann teldi mjög líklegt að vegurinn fari inn á samgönguáætlun en hann er ekki inni á áætluninni núna,“ segir Kristín María í samtali við Vísi.

Hún segir að það liggi þó fyrir að ekki verði farið í stórar framkvæmdir strax á borð við það að tvöfalda veginn eða lýsa hann upp. Hins vegar sé vilji til að bregðast við með einhverjum hætti og Grindavíkurvegur sé til að mynda í minnisblaði ríkisstjórnarinnar yfir vegi þar sem bregðast þurfi við.

„Það verður brugðist við með einhverjum hætti og vonandi á þessu ári. Þó að það sé ekki verið að fara í einhverjar brjálæðislegar framkvæmdir þá erum við að tala um að bæta merkingar og setja upp hraðamyndavélar sem mæla meðalhraða á veginum því hraðinn hefur líka áhrif,“ segir Kristín og bætir við:

„Það er mikill velvilji en við fundum það líka að ráðherrarnir fara mjög varlega í það að gefa einhver loforð sem þeir þurfa síðan kannski að svíkja,“ segir Kristín sem fjallar ítarlega um fundina tvo í færslu á heimasíðu Lista Grindvíkinga. Hún segist vilja upplýsa Grindvíkinga sem best um stöðu mála varðandi Grindavíkurveg því hún finni að málið liggi þungt á mörgum í bænum.

„Fólk veigrar sér við því að keyra veginn og fara ekki helst nema að nauðsyn krefji, sérstaklega á þessum árstíma,“ segir Kristín.  

Nánar má lesa um fundi samráðshópsins með ráðherrunum tveimur hér.