NRK prófar krossapróf til þess að halda "virkum í athugasemdum“ við efnið

Stjórnendur NRKbeta, tæknisíðu Norska ríkisútvarpsins, hafa útbúið nýtt tól til þess að tryggja að umræður í athugasemdakerfi við fréttir NRKbeta séu kurteislegar. Lesendur þurfa að standast þriggja spurninga krossapróf til þess að tryggja að þeir hafi lesið viðkomandi grein áður en hægt er að skrifa athugasemd.

„Okkur fannst við þurfa að gera okkar til þess að tryggja að allir séu á sömu blaðsíðu áður en þeir skilja eftir athugasemd,“ segir blaðamaður NRKbeta, Ståle Grut. „Ef allir átta sig á því hvað stendur í hverri frétt skapast mun betri grundvöllur til þess að tjá sig um hana.“

NRKbeta fjallar aðallega um þróun í tæknimálum og glíma stjórnendur síðunnar yfirleitt ekki við mikinn vanda þegar kemur að athugasemdum. Tónninn þar sé oftar en ekki mjög kurteisislegur enda sé síðan búin að byggja upp stöðugan lesendahóp.

Þó kemur fyrir að umfjöllun NRKbeta vekji mikla athygli og þá vill það gerast að gæði umræðunnar í athugasemdakerfi síðunnar fari hrakandi. Þetta gerðist til að mynda þegar umfjöllun NRKbeta um spjallborð þar sem myndum af stúlkum undur lögaldri var dreift.

Fréttin var sett á forsíðu NRK og fljótlega breyttist umræðan í athugasemdakerfi við fréttina í persónuárásir.

Vilja halda „virkum í athugasemdum“ við efnið

Í kjölfar þess hófst umræða um hvað væri hægt að gera til þess að koma í veg fyrir slík ummæli. Niðurstaðan var krossapróf með þremur spurningum. Hugmyndin er sú að með því sé tryggt að lesendur lesi þá umfjöllun sem um ræðir. Þá telja stjórnendur síðunnar að prófið geti haldið „virkum í athugasemdum“ við efni umfjöllunarinnar.

„Ef ætlunin er að rökræða eitthvað er mikilvægt að vita hvað stendur í greininni og hvað ekki. Annars er bara verið að láta móðan mása,“ segir Marius Arnesen, ritstjóri NRKbeta.

Prófin eru enn í þróun og birtast nú aðeins við sumar fréttir NRKbeta og semja blaðamenn spurningarnar sjálfir. Takist þetta vel er ætlunin að prófin fylgi öllum greinum NRKbeta. Engin ákvörðun hefur verið tekin um hvort að krossaprófin verði færð yfir á aðalsíðu NRK en Arnesen segir að NRK verði að taka slíkt til athugunar. Athugasemdir geti verið mikil viðbót við umfjöllun fjölmiðla en finna þurfi leiðir til þess að tryggja gæði umræðunnar.

Sjá má dæmi um grein þar sem lesendur þurfa að svara krossaprófi til þess að skilja eftir athugasemd hér.