Meirihluti á móti vegtollum

Um 58 prósent Íslendinga eru á móti vegtollum, sem notaðir yrðu til uppbyggingar á vegakerfinu, samkvæmt nýrri skoðanakönnun Maskínu. 42 prósent segjast vera hlynnt þeim.

Um 30 prósent þeirra sem svöruðu segjast vera hlynnt vegtollum til uppbyggingar á vegakerfinu aðeins þar sem val er um aðra leið. Tólf til þrettán prósent segjast vera hlynnt vegtollum til uppbyggingar á vegakerfinu óháð því hvort val um aðra leið er til staðar eða ekki.

Sunnlendingar og Reyknesingar eru helst á móti vegatollum, eða slétt 73 prósent en 50 prósent Reykvíkinga er á móti vegtollum. Einnig er munur á milli svarenda eftir menntun en þar eru á milli 72 og 73 prósent þeirra aðeins með grunnskólapróf á móti vegtollum en á billinu 54-57 prósent þeirra sem hafa lengri skólagöngu.

Hugmyndir samgönguráðherra, um að setja vegatoll á valdar leiðir í kringum höfuðborgarsvæðið, hafa víða fallið í grýttan jarðveg en settur hefur verið saman starfshópur til þess að vinna að hugmyndum um nýjar leiðir í fjármögnun samgöngumannvirkja. Engin ákvörðun hefur verið tekin um að að setja á vegtolla.