Pep Guardiola, knattspyrnustjóra Manchester City, var létt eftir 5-3 sigur sinna manna á Monaco í ótrúlegum leik í 16-liða úrslitum Meistaradeildar Evrópu í kvöld.
„Það var margt sem gekk á en við vorum heppnir. Ungu og gömlu leikmennirnir í liðinu spiluðu stórkostlega,“ sagði Guardiola í leikslok.
„Þessi reynsla mun koma okkur til góða í framtíðinni. Monaco á sér lengri sögu í þessari keppni og þú þarft svona reynslu til að læra og bæta þig. Það getur allt gerst í Mónakó og við þurfum að skora mörk.“
Varnarleikur liðanna í leiknum í kvöld var ekki til útflutnings. Sóknarleikurinn var hins vegar frábær.
„Við hugsum út frá sókninni. Sókn, sókn, sókn. Monaco skorar mikið og sækir á mörgum mönnum. Þeir eru líkamlega sterkir og með topp lið. Þess vegna eru þeir efstir heima fyrir,“ sagði Guardiola.
„Þetta eru ágætis úrslit. Þau gætu verið betri og gætu verið verri en svona er þetta.“
Guardiola: Sókn, sókn, sókn
Tengdar fréttir
Man. City og Monaco buðu til markaveislu á Etihad | Sjáðu mörkin
Manchester City vann Monaco, 5-3, í ótrúlegum fótboltaleik á Etihad vellinum í kvöld. Þetta var fyrri leikur liðanna í 16-liða úrslitum Meistaradeildar Evrópu.
