Seðlabankinn aðeins keypt gjaldeyri fyrir 5 milljarða á fyrstu vikum ársins

Gjaldeyriskaup Seðlabanka Íslands hafa dregist nokkuð saman að undanförnu en á fyrstu fjórum vikum nýs árs nema þau aðeins um fimm milljörðum króna. Það er um nítján prósent af heildarveltu á gjaldeyrismarkaði. Til samanburðar keypti Seðlabankinn hins vegar gjaldeyri fyrir um átján milljarða í desember og var hlutur bankans þá í veltunni um 45 prósent.

Á sama tíma og bankinn hefur haldið aftur af sér í gjaldeyriskaupum samhliða minna innflæði gjaldeyris á markað, sem stafar meðal annars af verkfalli sjómanna, þá hefur gengi krónunnar lækkað um fimm prósent gagnvart evru það sem af er ári.

Seðlabanki Íslands keypti erlendan gjaldeyri fyrir samtals 386 milljarða króna 2016 og jukust kaup bankans um 42% á milli ára. Þrátt fyrir þessi miklu gjaldeyrisinngrip hækkaði gengi krónunnar um 18,4 prósent á síðasta ári. 

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.