Meisam heimilað að ferðast til Bandaríkjanna

Meisam Rafiei hefur fengið heimild til að ferðast til Bandaríkjanna þar sem hann hyggst keppa fyrir Íslands hönd í taikwondo á Opna bandaríska meistaramótinu í Las Vegas.

RÚV greinir frá þessu en Meisam var í gær meinað að ferðast til landsins vegna nýrrar tilskipunar Donald Trump Bandaríkjaforseta sem bannar ríkisborgurum frá sjö ríkjum í Mið-Austurlöndum og Afríku að koma til landsins.

Meisam segir að sendiráð Bandaríkjanna á Íslandi hafi haft samband við sig og sagt að þar sem hann væri íþróttamaður á leið á keppnismót, væri honum heimilt að fara.

Meisam fékk íslenskan ríkisborgararétt fyrir fimm árum síðan en honum var meinað að fara til Bandaríkjanna sökum þess að hann er fæddur í Íran.

Meisam er landsliðsmaður Íslands í teakwondo og fyrrverandi landsliðsþjálfari.