Kim Kardashian lýsir árásinni í smáatriðum

Talið er að skýrsla sem tekin var af Kim Kardashian rétt eftir vopnað rán í París í október síðast liðinn hafi lekið til fjölmiðla. Það var dagblaðið Le Journal du Dimanche sem birti skýrsluna fyrst.

Samkvæmt henni var Kim á baðsloppnum einum klæða þegar mennirnir réðust upp í herbergið hennar þar sem hún var ein síns liðs. Í skýrslunni koma fram upplýsingar sem áður voru ókunnar almenningi, meðal annars hverju var stolið og hvernig ræningjarnir komu fram við Kim. 

Í skýrslunni segir að Kim hafi heyrt í einhverjum frammi á hótelganginum. Hún hafi kallað fram en enginn svaraði. Þá hringdi hún í lífvörðinn sinn og bað hann um að koma. Strax í kjölfarið ruddust tveir menn klæddir í lögreglubúninga inn á herbergið hennar. Á þeim tíma var Kim í baðslopp og í engu undir. Þeir heimtuðu að fá demantshringinn hennar. Hún þóttist ekki vita um hvað þeir væru að tala en svo beindu þeir byssu að henni og bentu á trúlofunarhringinn hennar sem lá á náttborðinu. 

„Á meðan þeir beindu byssunni að mér tóku þeir hringinn og spurðu mig hvar restin af skartgripunum og peningarnir væru. Þeir tóku mig þá fram á gang en svo aftur inn í herbergi þar sem þeir hentu mér á rúmið og bundu hendurnar mínar,“ segir Kim í skýrslunni. Þeir teipuðu einnig lappirnar hennar og yfir munninn hennar og settu hana í baðkarið inni á herberginu. 

Í kjölfarið tóku þeir demantshálsmen, Rolex úr, tvö demantsarmbönd, demantseyrnalokka og hálsmenn sem stóð á Saint úr demöntum. Þegar skýrslan var tekin taldi hún að tjónið væri umm á fimm milljónir dollara. 

Fjórir hafa verið handteknir grunaðir um að hafa átt aðild að verknaðinum.