Óvíst hvort Björt framtíð samþykki stjórnarsáttmála

Kurr er á meðal stjórnarmanna í Bjartri framtíð fyrir stjórnarfund í kvöld þar sem lokadrög að stjórnarsáttmála Sjálfstæðisflokks, Viðreisnar og Bjartrar framtíðar verða lögð fram til samþykktar eða synjunar. Þetta herma heimildir fréttastofu og er ástæðan sögð skýrsla sem kynnt var á föstudag um eignir Íslendinga í skattaskjólum.

Skýrslan var unnin að beiðni Bjarna Benediktssonar, fjármálaráðherra og formanns Sjálfstæðisflokksins, en um helgina var greint frá því að skýrslan hafi verið tilbúin um miðjan september. Bjarni fékk kynningu á henni þann 5. október en í kvöldfréttum RÚV á laugardag sagði Bjarni að hann hefði ekki séð skýrsluna fyrir þinglok en þingi lauk þann 13. október.

Eftir að í ljós kom að ráðherrann hafði í raun fengið kynningu á skýrslunni á meðan þing var enn að störfum baðst Bjarni afsökunar á því sem hann sagði hafa verið ónákvæmni í tímalínu vegna málsins. Þá hefur það verið gagnrýnt að skýrslan skuli ekki hafa verið kynnt og birt almenning fyrir þingkosningarnar sem fóru fram þann 29. október.

Þeir stjórnarmenn Bjartrar framtíðar sem fréttastofa hefur rætt við í dag segja að ný staða sé komin upp í stjórnarmynduninni vegna atburðarásarinnar í kringum skýrsluna og hafa orð eins og trúnaðarbrestur og breyttar forsendur verið nefnd í því samhengi. Það er því óvíst hvort stjórnarsáttmálinn verði samþykktur á stjórnarfundi Bjartrar framtíðar í kvöld en alls eru 79 manns í stjórn flokksins.

Í lögum Bjartrar framtíðar segir að stjórnin skuli taka afstöðu til þátttöku flokksins í ríkisstjórn en þar er ekki skýrar kveðið á um samþykkt eða synjun og því er óljóst hvaða merking verður lögð í ákvæðið.

 

Ráðgjafaráð Viðreisnar og flokksráð Sjálfstæðisflokks funda einnig í kvöld og verða lokadrög að stjórnarsáttmálanum lögð fram á fundum flokkanna.

Í kvöldfréttum Stöðvar 2 var meðal annars rætt við Óttar um birtingu skýrslunnar. Sagði hann það vera „leiðindaklúður“ og að skemmtilegra hefði verið að fá skýrsluna fram fyrir kosningar. Fréttina má sjá í spilaranum hér að neðan.