Spá 30 prósent tekjutapi vegna banns við stóru sprengjunum

Áætlað er að um þrjátíu prósent af flugeldaframboði sem björgunarsveitir bjóða núna til sölu verði ekki til sölu á næsta ári. Um 30 prósent af tekjunum hverfa með þessum vörum. Ástæðan er breyting á reglugerð um flugelda sem tekur gildi 15. janúar næstkomandi.

Breytingin, sem er gerð í samræmi við Evróputilskipun, felur í sér að allir skoteldar þurfi að vera CE-vottaðir og fylgja þurfi tilteknum stöðlum sem þýðir að púðurmagn í þeim skoteldum sem heimilt er að selja minnkar.

Jón Ingi Sigvaldason, sölu- og markaðsstjóri hjá Slysavarnafélaginu Landsbjörg, segir að á næsta ári verði brugðist við þessum aðstæðum með breyttu vöruúrvali.

Jón Ingi segir ágæta stemningu fyrir flugeldasölunni þetta árið.

„Þetta byrjar náttúrlega alltaf rólega, en fólk virðist vera spenntara en oft áður. Sérstaklega er maður að finna það úti á landi, viðskiptavinir eru argir yfir því að þetta er að fara og þeir eru að tryggja sér sínar bombur,“ segir hann.

Veðurguðirnir ættu að verða skotglöðum Íslendingum hliðhollir á gamlárskvöld. Búist er við að á laugardag verði minnkandi norðanátt og snjókoma. Sums staðar él við norðausturströndina en annars léttskýjað.

„Þannig að það er útlit fyrir fínasta veður,“ segir Elín Björg Jónasdóttir, veðurfræðingur á Veðurstofu Íslands.

Jón Ingi segir Landsbjörg ekki gera áætlanir um sölutekjur fyrir hver áramót.

„Við komum ekkert nálægt sölunni sjálfri. Það eina sem ég kem nálægt sölunni sjálfri er að ég geri auglýsingaplan og auglýsi og afhendi sveitunum vörurnar. En sveitirnar eru með söluna á sínum snærum. Ég er bara í innkaupum,“ segir Jón Ingi, sem segist jafnframt ekki fá upplýsingar frá sveitunum sjálfum.

„Nema einni og einni sem hringir og lætur mann vita,“ segir hann. Hann segir alla fjáröflun björgunarsveitanna vera þannig að hún skili sér beint til sveitanna sjálfra. 

Fréttin birtist fyrst í Fréttablaðinu