Borgin bannar eigendum að færa hús í Skuggahverfinu

Fulltrúar meirihlutans auk Framsóknarmanna í borgarstjórn synjuðu eigendum gamalla húsa á samliggjandi lóðum við Vegahúsastíg 1 og Klapparstíg 19 um deiliskipulagsbreytingu sem falið hefði í sér sex nýjar íbúðir á lóðunum.

Í umsögn skipulagsfulltrúa borgarinnar kemur fram að lóðareigendurnir hefðu að ósk borgarinnar lagt fram nýja tillögu um skipulag lóðanna eftir fund í lok nóvember. Þar var gert ráð fyrir að halda bæði í steinbæ á Klapparstígslóðinni og timburhús frá 1889 á Veghúsastíg 1 en færa það ofar í lóðina. Þá átti að auka magn nýbygginga um 300 fermetra, úr 810 fermetrum í 1.115. Nýbygging yrði reist fjær lóðarmörkum en áður hafi verið gert ráð fyrir.

„Sá hluti nýbygginga, sem gert var ráð fyrir að byggja við lóðarmörk Klapparstígs 17, var færður að lóðarmörkunum, en það hefði, ásamt hækkun bygginganna, í för með sér talsverða aukningu á skuggavarpi á lóðina Klapparstíg 17. Tillaga þessi tekur ekki nægilegt mið af gömlu húsunum sem gert er ráð fyrir að varðveita og er byggingarmagn samkvæmt breytingartillögu of mikið fyrir þessa lóð,“ segir í umsögn skipulagsfulltrúans.

Borgarfulltrúar Sjálfstæðisflokks greiddu atkvæði gegn því að ósk lóðareigendanna um nýtt skipulag yrði hafnað.

„Húsið við Veghúsastíg 1 var metið ónýtt árið 2011. Heilbrigðiseftirlit Reykjavíkur mat húsið óíbúðarhæft í byrjun árs 2012 og Minjastofnun affriðaði húsið á árinu 2014 vegna bágs ástands þess,“ bentu sjálfstæðismenn á í bókun og minntu á að Minjastofnun gerði ekki athugasemdir við að gamla timburhúsið yrði rifið. Eðlilegt væri að fallast á deiliskipulagsbreytinguna.

„Gamla timburhúsið við Veghúsastíg 1 hefur ótvírætt varðveislugildi,“ bókaði hins vegar meirihlutinn í borgarstjórn ásamt fulltrúum Framsóknarflokks. Ekki mætti „rífa það eða fjarlægja“.

Málið á sér allnokkra sögu sem hófst árið 2008 þegar lóðirnar tvær voru sameinaðar í eina. Samkvæmt deiliskipulagi frá 2004 mátti rífa steinbæinn á Klapparstíg 19 sem er sá síðasti sinnar tegundar í Skuggahverfinu.

„Árið 2009 var lögð fram fyrirspurn um nýbyggingu með sjö íbúðum og með þeirri tillögu var gert ráð fyrir að rífa bæði steinbæinn og timburhúsið,“ segir í upprifjun skipulagstjóra. Þessu hafnaði borgin á sínum tíma.

Eins og fyrr segir eru lóðareigendurnir nú tilbúnir að varðveita gamla húsið en færa það austar á lóðina. „Þó að timburhúsið sé illa farið, væri æskilegt að gera við það eða eftir atvikum endurbyggja það á núverandi stað, helst á upphaflegum undirstöðum,“ segir hins vegar í umsögn skipulagsstjóra. 

Fréttin birtist fyrst í Fréttablaðinu