Á pallborðsumræðu á vegum Kering á dögunum biðlaði breski fatahönnuðurinn Stella McCartney til tískubransans um að fara að huga betur að dýravelferð og umhverfinu. Stella hefur sjálf aldrei notað leður eða skaðleg gerviefni í flíkum sínum.
Hún segir að tískubransinn yfir heildina litið er langt á eftir þeirri vitundavakningu sem hefur orðið í heiminum í dag. Það sé margt hægt að gera til þess að koma í veg fyrir að nota dýr í vörum og of mikla notkun á vatni og eitruðum gerviefnum við framleiðslu.
„Tískubransinn er að komast upp með morð og það þarf að svara fyrir það,“ sagði Stella. Þegar hún byrjaði með sitt eigið merki sagði hún að fólk innan bransans hafi hlegið af henni fyrir hugmyndir sínar um hvernig tíska getur þrifist án þess að skaða umhverfið og dýr. Hún leggur einnig mikið upp úr öryggi starfsfólks síns en eins og frægt er eru mörg merki sem nota verksmiðjur í Indónesíu, Bangladesh og fleiri löndum þar sem lítil löggjöf er um öryggi á vinnustöðum og lágmarkslaun.
Eins og komið hefur fram er mikil vitundavakning búin að eiga sér stað um þessi málefni á seinustu árum og því kominn tími til að fleiri tískumerki fari að endurhugsa hvernig þau framleiða fötin sín.
