Látinn glímumaður fær að halda ÓL-silfrinu

Á dögunum kom í ljós að rússneski glímukappinn Besik Kudukhov hefði fallið á lyfjaprófi á Ólympíuleikunum í London árið 2012.

Hann var einn fjölmargra sem féll er lyfjaprófin frá 2008 og 2012 voru skoðuð á ný með nýjustu tækni.

Kudukhov vann til silfurverðlauna í London í 60 kg flokki í glímu. Hann lést svo ári síðar í bílslysi.

Er í ljós kom að hann hefði verið á sterum í London þurfti að taka ákvörðun um hvort taka ætti verðlaunin af fjölskyldu hans. Maðurinn sem varð í þriðja sæti, Indverjinn Yogeshwar Dutt, tók af skarið í þeirri umræðu.

„Ef það er mögulegt þá á hann að halda verðlaununum. Þar með heldur fjölskylda hans í sína virðingu. Mannúð er ofar öllu,“ sagði Dutt.

Alþjóð ólympíunefndin hefur því ákveðið að aðhafast ekki frekar í málinu og fjölskylda Kudukhov mun halda verðlaunum hans.