Aurum-málið: Fer fram á fjögurra ára fangelsi yfir Jóni Ásgeiri

Aðalmeðferð Aurum-málsins lauk í Héraðsdómi Reykjavíkur í gær. Málið var umfangsmikið enda tók aðalmeðferðin átta daga, tæplega fimmtíu vitni komu gáfu skýrslu fyrir dómi og málflutningur tók tvo daga. Ólafur Þór Hauksson saksóknari fer fram á þunga dóma yfir sakborningum í málinu, líkt og fram kemur í frétt mbl.is, en tæplega fjögur ár eru liðin frá því að ákæra í málinu var gefin út.

Í málinu eru þeir Lárus Welding fyrrverandi forstjóri Glitnis og Magnús Arnar Arngrímsson sem var framkvæmdastjóri fyrirtækjasviðs bankans ákærðir fyrir umboðssvik vegna sex milljarða króna lánveitingar Glitnis til félagsins FS38 ehf. í júlí 2008.

Þá eru þeir Jón Ásgeir Jóhannesson, einn stærsti eigandi Glitnis, og Bjarni Jóhannesson, sem var viðskiptastjóri hjá Glitni, ákærðir fyrir hlutdeild í meintum umboðssvikum en lánið var notað til að kaupa hlutabréf Fons í bresku skartgripakeðjunni Aurum Holdings Limited.

Sjá einnig: Lárus um Jón Ásgeir: „Hann hefur mjög óeðlilegan samskiptamáta“



Aðalmeðferð málsins fór nú fram í annað sinn í héraði en aðalmeðferð fór fyrst fram í málinu vorið 2014 og voru fjórmenningarnir allir sýknaðir. Einn dómara í fjölskipuðum héraðsdómi, Arngrímur Ísberg, vildi þó sakfella þá Lárus, Magnús og Jón Ásgeir en þegar málið var svo tekið fyrir í Hæstarétti eftir að ákæruvaldið áfrýjaði dómnum var dómurinn í héraði ómerktur. 

Hæstiréttur taldi að sérfróður meðdómandi málinu í héraði, Sverrir Ólafsson, hafi verið vanhæfur til að dæma í því. Sverrir er bróðir Ólafs Ólafssonar en hann var dæmdur í fangelsi fyrir aðild sína að Al Thani-málinu.

Þegar málið hafði verið sent aftur heim í hérað var síðan deilt um hæfi dómsformannsins í málinu, Guðjóns St. Marteinssonar, en saksóknari taldi dómarann hliðhollan sakborningum, meðal annars vegna þess sem fram kom í blaðagrein sem Guðjón ætlaði að birta í Fréttablaðinu en var aldrei birt. Skemmst er frá því að segja að Hæstiréttur taldi Guðjón vanhæfan til að dæma í málinu og þurfti því að skipa nýja dómara í héraði.

Sjá einnig: Telja að staða Glitnis hafi verið betri eftir lánið til FS38

Héraðsdómur hefur nú fjórar vikur til þess að kveða upp dóm í málinu. Eins og áður segir fer saksóknari fram á þunga dóma yfir fjórmenningunum. Þannig fer hann fram á að Jón Ásgeir verði dæmdur í fjögurra ára fangelsi og að Lárus fái hegningarauka við fimm ára fangelsisdóm sem hann fékk í héraði vegna Stím-málsins svokallaða en Hæstiréttur á enn eftir að taka það mál fyrir. Vill Ólafur Þór að refsing Lárusar verði samtals sex ár en það er þyngsta refsing sem menn geta hlotið fyrir efnahagsbrot.

Magnús Arnar hlaut tveggja ára dóm í Hæstarétti í svokölluðu BK-máli og fer saksóknari nú fram á tveggja ára hegningarauka við þann dóm. Þá vill saksóknari að Bjarni verði dæmdur í fangelsi í tvö til tvö og hálft ár.