Hjörtur lék allan tímann fyrir Bröndby

Hjörtur Hermannsson lék allan leikinn í miðri vörn Bröndby sem gerði jafntefli við Nordsjælland á útivelli í dönsku úrvalsdeildinni í knattspyrnu. Rúnar Alex Rúnarsson sat hins vegar á bekk Nordsjælland í dag en Rúnar hefur leikið flesta af leikjum liðsnis í deildinni til þessa.

Fyrir leikinn var Bröndby í þriðja sæti deildarinnar með 22 stig eftir að Randers skaust upp fyrir þá með sigri fyrr í dag. Nordsjælland var í 10.sætinu með 13 stig.

Bröndby var sterkari aðilinn í leiknum og átti töluvert fleiri tilraunir að marki en heimamenn. Það var þó Nordsjælland sem tók forystuna á 55.mínútu þegar Godsway Donyoh skoraði. Það stefndi allt í heimasigur en á 83.mínútu jafnaði Jan Kliment metin fyrir gestina og tryggði þeim stig.

Með stiginu færði Bröndby sig aftur upp fyrir Randers í töflunni og er í 2.sæti deildarinnar á markatölu með 23 stig, jafnmörg stig og Hannes Þór Halldórsson og félagar í Randers. FC Kaupmannahöfn er í efsta sætinu með 29 stig.