Rúmlega þúsund manns handteknir í Gabon

Lögregla í Afríkuríkinu Gabon hefur handtekið á annað þúsund manns í kjölfar umdeildra úrslita í forsetakosningum landsins. Innanríkisráðherra landsins segir mótmælendur hafa kastað handsprengjum og beitt skotvopnum í aðgerðum sínum.

Kjörstjórn segir forsetann Ali Bongo hafa verið endurkjörinn með 49,9 prósent atkvæða, en andstæðingur hans, Jean Ping, hlotið 48,2 prósent atkvæða. Þetta verður annað kjörtímabil hins 57 ára Bongo, en faðir hans, Omar Bongo, stýrði landinu í 41 ár. Framkvæmd kosninganna hefur verið harðlega gagnrýnd.

Í frétt Guardian er haft eftir Ping að tveir hafi fallið og nítján manns særst í árás öryggissveita á höfuðstöðvar flokks síns.

Mörg þúsund manns mótmæltu á götum höfuðborgar landsins, Libreville,  eftir að úrslit kosninganna voru gjörð kunn, þar sem meðal annars var borinn eldur að þinghúsi landsins.

Lögregla í Libreville hefur beitt táragasi og nú lokað stóru svæði í kringum þinghúsið.