Tebow stóð sig ágætlega á hafnaboltaæfingunni

Íþróttamaðurinn vinsæli, Tim Tebow, bauð öllum hafnaboltaliðum Bandaríkjann á opna æfingu hjá sér í gær þar sem hann ætlaði að sanna sig í íþróttinni.

Tebow sló í gegn sem leikstjórnandi hjá Denver Broncos í NFL-deildinni en fékk síðan fá tækifæri og hefur ekki verið á radar NFL-liða síðustu ár.

Hann var liðtækur í hafnabolta á sínum yngri árum og ætlar nú að reyna að komast í MLB-hafnaboltadeildina.

Það er ekki hver sem er sem getur boðað lið á opna æfingu og þau koma. Það getur Tebow aftur á móti en 42 njósnarar voru mættir til þess að skoða hann í gær.

Hann þótti standa sig ágætlega á æfingunni en efasemdir eru um hvort hann sé nógu góður fyrir MLB. Ekki er ólíklegt að eitthvert lið muni taka hann enda mun koma Tebow skapa miklar tekjur fyrir viðkomandi lið enda með eindæmum vinsæll einstaklingur.

Þó svo Tebow hafi ekki spilað íþróttir sem atvinnumaður síðustu ár mokar hann inn peningum og fyrir æfinguna gerði Adidas stóran samning við hann til nokkurra ára.

Hér má sjá tilþrif Tebow á æfingunni en hann negldi nokkrum boltum úr fyrir völlinn.