Ásta Guðrún vill leiða lista Pírata

Ásta Guðrún Helgadóttir, þingmaður Pírata, gefur kost á sér í fyrsta sæti í öðru hvoru Reykjavíkurkjördæmi í prófkjöri Pírata fyrir væntanlegar þingkosningar í haust. Ásta Guðrún tók sæti á Alþingi fyrir Pírata eftir að Jón Þór Ólafsson hætti þingmennsku haustið 2015.

Tilkynnti hún um framboð sitt á Facebook-síðu sinni fyrr í dag og hefur hún skilað inn framboði sínu með formlegum hætti.

„Ég ætla að sækjast eftir því að leiða listann í öðruhvoru Reykjarvíkurkjördæminu en tek því sæti sem grasrót Pírata treystir mér fyrir,“ segir Ásta Guðrún.

Segir hún að þingseta sín undanfarna tíu mánuði hafi verið mikil reynsla og að sú reynsla verði gagnleg fyrir Pírata á næsta kjörtímabili. Stefnt er að því að þingkosningar verði haldnar í haust.