Löw: Vorum betra liðið

Joachim Löw, þjálfari Þýskalands, segir að sínir menn hafi verið sterkari aðilinn í 0-2 tapinu fyrir Frakklandi í undanúrslitum EM 2016 í Marseille í kvöld.

„Við vorum betra liðið. Við lögðum mikið í leikinn en vorum óheppnir að fá á okkur vítaspyrnu rétt fyrir hálfleik,“ sagði Löw eftir leikinn.

Þjóðverjar réðu ferðinni í fyrri hálfleik en Bastian Schweinsteiger, fyrirliði þýska liðsins, fékk dæmda á sig vítaspyrnu í uppbótartíma sem Antoine Griezmann skoraði úr.

„Við fengum okkar færi en nýttum þau ekki. Við höfðum heppnina ekki með okkur. Þegar við duttum út á HM 2010 og EM 2012 töpuðum við fyrir betri liðum en í dag vorum við betri en Frakkar en töpuðum samt,“ sagði Löw og bætti því að Þjóðverjar hefðu saknað Sami Khedira, Mats Hummels og Mario Gómez sem misstu af leiknum í kvöld. Þá fór Jerome Boateng meiddur af velli í upphafi seinni hálfleiks.

„Það er erfitt að fylla þessi skörð. En liðið gerði allt það sem ég bað það um, sýndi mikið hugrekki og ég get ekki áfellst mína menn.“

Löw telur að Frakkar muni vinna Portúgala í úrslitaleiknum á Stade de France á sunnudagskvöldið.

„Frakkar eru komnir í úrslitaleikinn - ef þú vinnur 2-0 áttu það skilið. Ég held að Frakkar vinni úrslitaleikinn, Portúgal hefur ekki sannfært mig hingað til. Frakkar eru með mjög sterkt lið en við vorum betra liðið í dag,“ sagði Löw að lokum.