Dómur yfir Sævari í Leonard staðfestur

Hæstiréttur staðfesti í dag dóm Héraðdsóms Reykjaness þess efnis að Sævar Jónsson, yfirleitt kenndur við Leonard, verði dæmdur í tólf mánaða fangelsi fyrir skilasvik. Fullnustu níu mánuða refsingarinnar er bundin skilorði og fellur niður að tveimur árum liðnum.

Sævari var gefið að sök að hafa komið undan íbúðarhúsi í Flórída sem hann og eiginkona hans keyptu árið 2007 á rúmlega 657 þúsund Bandaríkjadali, eða tæpar 81 milljónir króna á núverandi gengi, skömmu áður en hann var úrskurðaður gjaldþrota árið 2010.

Sævar hafði afsalað eigninni til félags þar sem hann gengdi stjórnarformennsku fyrir tíu dollara. Hann er þannig sagður hafa skotið eignarhluta sínum undan búskiptunum eða varið andvirði eignarhlutans til greiðslu tiltölulega hárrar gjaldkræfrar kröfu.

Fyrir héraðsdómi bar Sævar því við að hann hefði selt húsið árið 2007 en ekki hefði verið gengið frá viðskiptunum formlega fyrr en árið 2010, örskömmu áður en hann var úrskurðaður gjaldþrota. Hann hefði skuldað félaginu sem eignaðist húsið fé og það hefði verið tekið upp í skuldina.

Hæstiréttur féllst á niðurstöðu héraðsdómara þess efnis að Sævar hefði haft einbeittan ásetning um að koma húsinu undan. Þá hafi hann einnig gefið skiptastjóra og lögreglu rangar upplýsingar þegar tilvist hússins var rannsökuð.

Sævar áfrýjaði dómnum af sinni hálfu í febrúar í fyrra. Málsgögn frá ríkissaksóknara bárust réttinum hins vegar ekki fyrr en rúmu ári síðar. Af þessum óútskýrða drætti leiddi það að refsing Sævars yrði ekki þyngd.

Dóm Hæstaréttar má lesa í heild sinni hér.