Ýmist ekki svarað eða fullur stuðningur við þá niðurstöðu sem Bjarni mun komast að

Ásmundur Friðriksson, Jón Gunnarsson, Óli Björn Kárason og Vilhjálmur Árnason, þingmenn Sjálfstæðisflokksins, munu samþykkja þá niðurstöðu sem Bjarni Benediktsson, formaður flokksins, kemst að í viðræðum við Sigurð Inga Jóhannsson, forsætisráðherraefni Framsóknarflokksins.

Þetta sögðu þeir aðspurðir hvort þeir myndu styðja ríkisstjórn Framsóknar og Sjálfstæðisflokksins með Sigurð Inga Jóhannsson í brúnni í stöðu forsætisráðherra.

Vilhjálmur Bjarnasons, þingmaður flokksins, sagði „pass“ við spurningu blaðamanna en fjórtán þingmenn flokksins svöruðu ekki í síma. Bjarni og Sigurður Ingi ræddu saman í gær með það fyrir augum að viðhalda stjórnarsamstarfinu.

Áður hafði Bjarni sótt til þess leyfi til forseta Íslands, Ólafs Ragnars Grímssonar. Þá hefur Bjarni verið skýr að því leyti að hann fari ekki inn í viðræður við Framsókn með þá kröfu að verða forsætisráðherra.

„Þetta kom ágætlega fram hjá formanni flokksins í gær,“ sagði Jón Gunnarsson í samtali við Vísi. „Það er vilji þessara flokka að hlaupa ekki frá mikilvægum verkefnum og klára það sem að útaf stendur.“

Aðspurður hvort að til greina komi að styðja ríkisstjórn undir forystu Sigurðar Inga sagði Jón:

„Ég treysti mínum formanni til að lenda þessu samstarfi til að það verði gott áfram.“

Óli Björn Kárason, varaþingmaður flokksins sem situr á þingi í fjarveru Ragnheiðar Ríkharðsdóttur, segir enga fundi boðaða hjá flokknum í dag.

„Auðvitað eru menn bara vakandi og tilbúnir með skömmum fyrirvara að koma saman.“

Hann fékk sömu spurningu og Jón Gunnarsson, varðandi hans hug til ríkisstjórnar undir forystu Sigurðar Inga:

„Bjarni og Ólöf marka þá stefnu og munu eiga viðræður og koma með tillögu. Ég mun styðja þá tillögu sem þau koma með fram.“

Ásmundur Friðriksson segir afar mikilvægt að flokkarnir fái tíma til að ljúka sínum störfum.

„Ég verð mjög sáttur ef við getum það.“

Vilhjálmur Árnason segist styðja það ferli sem er í gangi flokkanna á milli og segir ekki máli skipta hver verði forsætisráðherra. Eingöngu að ró komist á í samfélaginu. Þá sé hann sáttur.