Afturelding komst upp að hlið FH og KA/Þór með sigri

Afturelding vann annan leik sinn í röð í Olís-deild kvenna í dag á heimavelli í dag 25-24 gegn KA/Þór. Eftir að hafa verið undir í hálfleik náðu Mosfellskonur að snúa taflinu sér í hag í seinni hálfleik.

Mosfellskonur sem unnu sjö marka sigur á FH í síðustu umferð voru lengi af stað og leiddu gestirnir að norðan í hálfleik 13-12.

Í seinni hálfleik náðu Mosfellskonur aftur á móti að snúa taflinu sér í hag og stela sigrinum á heimavelli 25-24 en með sigrinum skaust Afturelding upp fyrir ÍR og upp að hlið FH og KA/Þór þegar tvær umferðir eru eftir.

Hekla Ingunn Daðadóttir var atkvæðamest í liði Aftureldingar með 10 mörk en næst kom Telma Rut Frímannsdóttir með fimm mörk. Í liði gestanna var það Birta Fönn Sveinsdóttir sem var markahæst með átta mörk.