30 þúsund lítrum af jólabjór fargað

745 þúsund lítrar af jólabjór seldust í vínbúðunum um síðustu jól og er það 11,4 prósenta aukning frá því í fyrra þegar um 669 þúsund lítrar af bjór seldust. 33 þúsund lítrar seldust ekki fyrir 6. janúar og verða endursendir til birgja og framleiðenda og langmestu af bjórnum verður fargað.

Agnes Anna Sigurðardóttir, framkvæmdastjóri Kalda á Árskógsandi, segir vel hafa gengið hjá fyrirtækinu við sölu jólabjórs. „Af um 170 þúsund flöskum sem við framleiddum í fyrra eru um 700 flöskur að koma til baka. Langstærstum hluta verður fargað til að fá endurgreitt áfengisgjald og skilagjald sem eru stórir kostnaðarliðir hjá okkur,“ segir Agnes.

Tuborg-jólabjórinn var mest seldi jólabjórinn um þessi jól. Rétt tæplega 300 þúsund lítrar af honum voru seldir í vínbúðunum eða um 40 prósent alls jólabjórs. Víking jólabjór var seldur í um 120 þúsund lítrum og Thule í tæplega 90 þúsund lítrum. Jólagull og Jólakaldi voru á svipuðum slóðum í ár en um 50 þúsund lítrar af þeim bjórum seldust um þessi jól.