Ísland getur enn farið með fjögur stig inn í milliriðil | Allt eða ekkert leikur á móti Króatíu?

Íslenska handboltalandsliðið tapaði í dag fyrir Hvít-Rússum í öðrum leik sínum á Evrópumótinu í Póllandi. Íslenska liðið hefði tryggt sig áfram með sigri í dag en nú þarf ýmislegt að falla með íslenska liðinu til þess að strákarnir okkar komist áfram upp úr riðlinum.

Noregur vann Króatíu í hinum leik riðilsins og öll liðin í riðlinum eru þar með jöfn með tvö stig. Í lokaumferðinni mætast lið Noregs og Hvíta-Rússlands annarsvegar og lið Íslands og Króatíu hinsvegar.

Hvíta-Rússland getur tryggt Íslandi sæti í milliriðlinum með því að vinna Noreg í fyrri leiknum á þriðjudaginn en jafntefli eða sigur Norðmanna myndi þýða að Ísland yrði að ná í stig í móti Króötum í seinni leik dagsins til að komast áfram á kostnað Hvít-Rússa.  

Vinni Ísland og Noregur í lokaumferðinni þá færi Ísland aftur á móti áfram í milliriðilinn með fjögur stig eða fullt hús stiga.

Það eru því allt eins líkur á því að íslenska liðið lendi í leik í þeirri stöðu í leiknum á móti Króatíu að tap þýddi að Ísland væri á leiðinni heim en sigur þýddi að íslenska liðið væri með fjögur stig og yrði þar með í frábærum málum í milliriðlinum.

Hér fyrir neðan er farið yfir stöðuna í B-riðlinum og það má sjá á henni að allt getur ennþá gerst í þessum æsispennandi riðli.



Svona kemst Íslands áfram í milliriðillinn

Hvíta Rússland vinnur Noreg

- Ísland komið áfram [Noregur eða Króatía úr leik]

Hvíta Rússland og Noregur gera jafntefli

- Ísland verður að fá stig á móti Króatíu [Hvíta Rússland úr leik]

Noregur vinnur Hvíta Rússland

- Ísland verður að fá stig á móti Króatíu [Hvíta Rússland úr leik]



Hversu mörg stig fer Íslands með í milliriðilinn, komist liðið áfram:

4 stig

Ísland vinnur Króatíu og Noregur vinnur Hvíta-Rússland

[Ísland 4 stig, Noregur 2 stig, Króatía 0 stig - Hvíta Rússland úr leik]

3 stig

Ísland gerir jafntefli við Króatíu og Noregur vinnur Hvíta-Rússland

[Ísland 3 stig, Noregur 2 stig, Króatía 1 stig - Hvíta Rússland úr leik]

2 stig

Ísland vinnur Króatíu og Hvíta-Rússland vinnur Noreg

[Hvíta-Rússland 2 stig, Ísland 2 stig, Noregur 2 stig  - Króatía úr leik]

1 stig

Ísland gerir jafntefli við Króatíu og Hvíta-Rússland vinnur Noreg

[Króatía 3 stig, Hvíta-Rússland 2 stig, Ísland 1 stig  - Noregur úr leik]

0 stig

Hvíta-Rússland vinnur Noreg og Ísland tapar á móti Króatíu

[Króatía 4 stig, Hvíta Rússland 2 stig, Ísland 0 stig  - Noregur úr leik]

Það bætist síðan enn við útreikninginn endi leikur Hvít-Rússa og Norðmanna með jafntefli.