Faglegt æskulýðsstarf í Hafnarfirði

Styttri vinnudagur barna er ein af megináherslum Bjartrar framtíðar í Hafnarfirði. Aukin samfella í skóladeginum, frístunda- og félagsstarfi auk annarrar virkni á borð við listnám eða íþróttir, er að okkar mati lykill að þessu markmiði. Fagleg, góð og hagkvæm þjónusta við börn og fjölskyldur þeirra er okkur hjartans mál sem við stefnum að með öllum færum leiðum.

Nýlega samþykkti bæjarstjórn Hafnarfjarðar breytt skipurit bæjarins, sem felur meðal annars í sér tilfærslu íþrótta- og tómstundamála til baka frá fjölskyldusviði til fræðslusviðs. Í því felst að rekstur frístundaheimila verður samþættur við annað starf skólanna. Rétt er að árétta að endanleg útfærsla á umræddum breytingum er ekki búin, þar sem eftir er að fjalla um þau mál jafnt á vettvangi stjórnsýslu sem kjörinna fulltrúa í viðeigandi ráðum og nefndum.

Ný vinnubrögð

Nýútkominni úttekt ráðgjafafyrirtækjanna Capacent og R3 á rekstri Hafnarfjarðarbæjar fylgir fjöldi tillagna um skipulags- og rekstrarbreytingar af ýmsu tagi. Úrvinnsla þessara ábendinga stendur nú fyrir dyrum innan stjórnkerfis bæjarins. Skiljanlegt er að þessi vinnubrögð geti, og hafi, valdið misskilningi, þar sem tillögurnar eru birtar í heild sinni með opnum hætti áður en endanleg ákvörðun á grunni þeirra hefur verið tekin. Með þeim hætti er aðgengi íbúa að ferlinu opnað, í samræmi við stefnu Bjartrar framtíðar um opna stjórnsýslu.

Í fullkomnum heimi væru umræður um tillögur ráðgjafanna lausar við verðmiða og kostnaðarvitund. Staða mála er hins vegar sú að bæjarstjórn Hafnarfjarðar verður að finna leið til að létta rekstur bæjarins. Markmiðið í þeim efnum er að finna svigrúm upp á 5-600 milljónir króna. Þetta verðum við að hafa hugfast í þeirri úrvinnslu á niðurstöðum rekstrarúttektar sem fram undan er.

Þessi nauðsyn til að mæta slæmri fjárhagsstöðu eykur enn mikilvægi þess að ferlið sé opið gagnvart íbúum, enda brýnt að hlustað sé á vilja bæjarbúa og leitast við að mæta óskum þeirra eins og hægt er. 

Breytingar – ógn eða tækifæri?

Björt framtíð leggur megináherslu á að tilfærsla á rekstri frístundaheimila í skólunum frá fjölskyldusviði til fræðslusviðs hafi ekki áhrif á faglegt starf nema þá til eflingar. Áfram verði forstöðumenn á hverjum stað, auk þess sem fagstjóri starfi áfram í miðlægri stjórnsýslu. Þessar áherslur eru í samræmi við vinnu þverpólitísks starfshóps sem fjallað hefur um frístundastarfið undanfarna mánuði. Skýr greinarmunur er gerður á rekstrarlegri stjórnun og faglega þættinum. 

Fjölmörg tækifæri fylgja breyttu skipuriti. Meðal annars er tækifæri til að draga úr starfsmannaveltu með því hugsanlega að geta boðið starfsfólki frístundaheimila lengri starfsdag og hærra starfshlutfall. Þá er tækifæri til að auka samfellu í vinnudegi barnanna okkar með því að tryggja að stoðþjónusta sé samfelld og fleira mætti nefna. Málið snýst á endanum um að efla vellíðan og þroska barna okkar. 

Horft verður til reynslu annarra sveitarfélaga á sambærilegu fyrirkomulagi, þ.e. að fella rekstur frístundaheimila inn í heildarstarf skólanna. Við erum t.d. meðvituð um það að gæta þarf að fjárveitingum til frístundamálanna svo þau verði ekki afgangsstærð í heildarrekstrinum.

Ræðum málin til enda

Frá því tillögur ráðgjafa voru birtar á vef bæjarins hafa þær verið túlkaðar með ýmsum hætti, meðal annars af hálfu minnihlutans í bæjarstjórn Hafnarfjarðar. Þessar tillögur eru grunnur að ákvarðanaferlinu sem fram undan er, þær ber ekki að túlka sem endanlega niðurstöðu, fyrst þurfa þær umfjöllun. 

Við vonumst eftir víðtækri þátttöku í því samtali og munum sjálf hafa að leiðarljósi að finna sem best jafnvægi milli óumflýjanlegrar leiðréttingar á slæmri fjárhagsstöðu og áframhaldandi uppbyggingar á öflugri þjónustu við bæjarbúa. Það verkefni mun vafalaust kalla á útsjónarsemi og því kjósum við að nálgast það með opnum hug og bjartsýni, í anda Bjartrar framtíðar.