Sjúkraflug í hæsta forgangi treysti á neyðarbrautina

Sjúklingur með alvarleg höfuðmeiðsl var fluttur með sjúkraflugi í hæsta forgangi frá Akureyri til Reykjavíkur í dag þrátt fyrir að innanlandsflug lægi niðri. Umdeild flugbraut Reykjavíkurflugvallar var sú eina sem hægt var að lenda á.

Sjúkrabíll var að aka frá Landspítalanum þegar flugvél Mýflugs birtist úr sortanum í aðflugi um eittleytið. Viðvörun hafði verið gefin út frá Veðurstofu um mikla ókyrrð í lofti og aflýsti Flugfélag Íslands öllu innanlandsflugi sínu í dag og Flugfélagið Ernir fyrri hluta dags. 

Í Reykjavík var suðvestanátt á þessum tíma og svo hvöss að aðeins ein flugbraut var fær til lendingar, að sögn flugstjórans, - brautin sem borgarstjórn Reykjavíkur krefur innanríkisráðherra um að verði lokað til að unnt sé að hefja byggingarframkvæmdir við brautarendann.

„Það var fært að lenda vegna þess að við höfðum braut sem lá við vindstefnunni. Það er þessi fræga neyðarbraut,“ sagði Þorkell Ásgeir Jóhannsson, flugstjóri hjá Mýflugi, í viðtali við Stöð 2 eftir lendingu. „Hinar brautirnar tvær voru út fyrir mörk hjá okkur og við hefðum ekki lent án þess að hafa þessa neyðarbraut.“ 

Sjúklingurinn var karlmaður sem hlotið hafði alvarlega höfuðáverka í slysi í heimahúsi á Akureyri og þótti brýnt að flytja hann á Landspítalann í Reykjavík. „Þetta er hæsti forgangur hjá okkur, höfuðmeiðsl,“ sagði Þorkell.

En ef þessi flugbraut hefði ekki verið tiltæk, hvað hefði þá verið unnt að gera? Þorkell nefnir að þá hefði hugsanlega verið hægt að fá þyrlu úr Reykjavík til að sækja sjúklinginn. „Og verið þrefalt lengur að klára þetta útkall.“ 

Hann segir að þyrla hefði hugsanlega þurft að fljúga með ströndinni að hluta og út fyrir Tröllaskaga. „Annað sem er slæmt fyrir sjúkling með höfuðmeiðsli er að þurfa að fljúga án jafnþrýstibúnaðar í farþegaklefa. Þyrlan hefur það ekki,“ sagði Þorkell.

Sjúkraflug Mýflugs frá Akureyri til Reykjavíkur tók um 45 mínútur, þrátt fyrir sterkan mótvind. Ókyrrðin náði upp í ellefu þúsund feta hæð. Þorkell segir að þeir hafi að mestu sloppið við hana með því að fljúga lengst af vel yfir þeirri hæð. Þá hafi þeir komið hátt inn á aðflugspunkt við Akranes og hringað sig niður yfir flóanum, fjarri fjöllum, til að forðast ókyrrðina.