Fyrstu hálkuslys vetrarins

Enginn slasaðist alvarlega í tveimur fyrstu hálkuslysum vetrarins, sem urðu með skömmu millibili á Öxnadalsheiði um kvöldmatarleitið í gær. Í báðum tilvikum rákust tveir fólksbílar saman.

Flutningabílstjórar lentu svo í erfiðleikum í Bakkaselsbrekku, en komust leiðar sinnar eftir að þeir höfðu sett keðjur undir bílana.

Veginum var lokað í um það bil klukkustund á meðan lögregla og björgunarmenn greiddu úr árekstrunum, en Vegagerðin sendi svo sandbíla á heiðina og var hún þá opnuð á ný.