Mistök kostuðu Ragnheiði Söru sigurinn í sandpokaburði

Fyrsta keppnisdegi Heimsleikanna í CrossFit lauk í gær. Ragnheiður Sara Sigmundsdóttir er efst íslensku keppendanna en hún er í þriðja sæti í kvennaflokki eftir greinarnar tvær. Björgvin Karl Guðmundsson er í sjötta sæti í karlaflokki.

Ragnheiður lenti í áttunda sæti í sundþraut dagsins í gær og í fjórða sæti í sandpokahlaupinu. Í sandpokagreininni gerði hún smá mistök er hún byrjaði á þyngsta pokanum en sá var rauður á lit. Reglurnar sögðu að enda skyldi á þeim poka og því þurfti hún að skila honum aftur og taka léttari pokana á undan. Það kostaði hana líklega sigurinn í WOD-inu.

„Mér leið vel í sjónum og þá sérstaklega í sundinu en ég kunni verr við brettið,“ segir Ragnheiður Sara. „Sandpokarnir voru erfiðari en ég átti von á. Maður fann vel fyrir hitanum og loftið var þungt. Ég er sátt með útkomuna þrátt fyrir smá mistök.“

„Mér leið hrikalega vel í sjónum og ágætlega á brettinu. Við vissum að Ástralarnir yrðu góðir á brettunum en annað vissum við ekki,“ segir Björgvin Karl. „Ég hef lagt mikla áherslu á sund að undanförnu og það skilaði sér í dag. Það hjálpaði líka að vera yfir meðalhæð í sandpokagreininni. Ég byrjaði illa en náði því til baka. Ég átti ekki von á að vera sjötti en það gerir mig bara graðan í að halda því sæti.“

Annie Mist Þórisdóttir er næst íslensku stelpnanna á eftir Ragnheiði Söru en hún er í sjötta sæti. Katrín Tanja Davíðsdóttir er fimmtánda og Þuríður Erla Helgadóttir er í 31. sæti.

Lið CrossFit Reykjavíkur gekk illa í fyrri þraut dagsins og endaði í 39. sæti af fjörutíu. Í boðhlaupinu gekk þeim betur og lentu í tuttugasta sæti. Liðið er í 35. sæti eftir daginn.

„Okkur leið sæmilega í sjónum fyrir utan smá krampa en réttstöðulyftan með orminn gekk ekki nógu vel. Vantaði aðeins upp á samvinnuna hjá okkur. Boðhlaupið gekk síðan mjög vel.“

Dagurinn í dag er hvíldardagur hjá keppendum svo þeir geti safnað kröftum fyrir komandi átök. Á fimmtudaginn bíður einstaklinganna svokölluð „Murph“ æfing og snörunarstigi. Liðin takast á við „jarðar orm“ og síðari æfingin gefur í raun þreföld stig. Liðsmönnum er skipt niður í þrjú pör og tekst hvert par á við eina grein sem telur til stiga. 

Hér að neðan er hægt að sjá hvernig konurnar stóðu sig í sandpokaburði. 

“It's going to be a lot of pressure,” she said. “But I'm good with pressure.” —Sara Sigmundsdottir pic.twitter.com/efbuUTI0Ye

— The CrossFit Games (@CrossFitGames) July 21, 2015