Deila um ágæti Airbnb: Plága eða jákvæð þróun?

Egill Helgason, fjölmiðlamaður, segir á bloggi sínu Airbnb vera góða hugmynd sem nú sé orðin að plágu. Airbnb er vefsíða þar sem fólk getur skráð íbúðir sínar og leigt þær svo út til ferðamanna. Þjónustan nýtur mikilla vinsælda og sífellt fleiri Íslendingar leigja út húsnæði sitt í gegnum síðuna.

Ljóst er að skiptar skoðanir eru um ágæti deiliþjónustu á borð við Airbnb því Hjálmar Gíslason, frumkvöðull, deilir bloggi Egils á Facebook-síðu sinni og segir hann fara með „bölvaða vitleysu.“

Egill leggur út af því að Airbnb sé annars vegar svar við því hve hótelgisting sé orðin dýr og hins vegar svar við auknum ferðamannastraumi.

„Og ástæða þessa er síaukið framboð á ódýrum flugferðum. Það ekki eins dýrt að ferðast og áður, en það er óþægilegra. Alls staðar eru ferðamenn að troðast og ferðamenn að bölva öðrum ferðamönnum vegna troðningsins.

Airbnb er ein lausnin á þessu. En svo fer það alveg út í öfgar. Miðbæir eru undirlagðir af leiguíbúðum fyrir ferðamenn. Leiguverð rýkur upp. Venjulegt fólk þarf að fara annað. Þetta hefur vond áhrif á mannlífið. Staðir sem áður höfðu sinn lókal sjarma verða túristabæli.“

„Hræsnin í kringum ferðamannaiðnaðinn er óskapleg“

Hjálmar er ekki sammála þessu mati Egils og segir deiliþjónustu eins og AirBnB „gera annað af tvennu og líklegast hvort tveggja í bland:“

„Koma í veg fyrir enn meiri hótelfjárfestingu (magn gistirýmis í boði á AirBnB jafnast nú á við það sem stærstu hótelkeðjur heims bjóða) og gera fólki kleyft að ferðast til nýrra áfangastaða og gista þar ódýrar en ella.

Sterkefnaður félagi minn - sem er afar umhugað um umhverfismál og þá sérstaklega loftslags- og orkumál - vill meina að ekkert hafi dregið jafn mikið úr óþarfri orkunotkun og orku- og umhverfisfrekum fjárfestingum á síðustu árum og deiliþjónustur í formi AirBnB, Zipcar og Uber, og samt erum við bara rétt í upphafi þessarar byltingar.“

Miklar umræður hafa svo skapast á síðu Hjálmars þar sem fólk ræðir um ágæti bæði Airbnb og leigubílaþjónustunnar Uber. Sitt sýnist hverjum og vill Egill til að mynda ekki taka undir jákvæðu umhverfisáhrifin sem Hjálmar segir að deiliþjónustur hafi:

„Og, er eitthvað sérlega jákvætt við það að fólk geti ferðast til nýrra áfangastaða og gist ódýrt. Hræsnin í kringum ferðmannaiðnaðinn er óskapleg, en ég veit ekki betur en að flugferðir séu sirkabát það versta í heimi hvað varðar loftslagsbreytingar.“

Hjálmar svarar Agli og segir hræsnina varðandi ferðalög þeirra sem minna hafa á milli handanna vera hræsnina eða þversögnina í umhverfisbyltingunni allri:

„Ef allir ætla að fara að gera það sem hingað til hefur aðeins verið á færi okkar efnameira fólksins þá fer allt til fjandans. Bönnum það!“

Sorrý, en þetta er bara bölvuð vitleysa. Deilikerfi á borð við AirBnB gera annað af tvennu og líklegast hvort tveggja í...

Posted by Hjalmar Gislason on Wednesday, 15 July 2015