Vill Skeljagrandabróður eldri í fimm ára fangelsi

Munnlegur málflutningur í málum ákæruvaldsins gegn Kristjáni Markúsi Sívarssyni, Marteini Jóhannssyni, Ríkharði Júlíusi Ríkharðssyni og tveimur 19 ára piltum hófst í Héraðsdómi Reykjaness í morgun.

Kristján Markús er ákærður í fjölda mála, meðal annars fyrir fimm ofbeldisbrot, nokkra þjófnaði og umferðarlagabrot. Fer saksóknari fram á fimm ára fangelsisdóm yfir honum.

Í einu málanna er Kristján ákærður ásamt Marteini og Ríkharði fyrir sérstaklega hættulega líkamsárás og frelsissviptingu í Kópavogi í febrúar í fyrra.

Hefur játað hluta þess sem ákært er fyrir

Þremenningarnir komu þá inn á heimili manns og réðust þar í sameiningu á hann, meðal annars með höggum og spörkum. Þá var hann tekinn kverkataki svo honum lá við köfnun auk þess sem hann var stunginn með skærum í öxlina.

Kristján Markús játaði fyrir dómi að hafa kýlt manninn tvisvar eða þrisvar og potað í hann með skærum en sagði að þau hefðu ekki rist djúpt. Þá játaði Ríkharð fyrir dómi að hafa hugsanlega hrint manninum en neitaði því að hafa tekið hann kverkataki. Hann viðurkenndi hins vegar við skýrslutöku að hafa gert það.

Marteinn hefur aðeins viðurkennt að hafa verið á staðnum en neitar að hafa tekið þátt í árásinni.



Hrottafengin og gróf árás

Fram kom í máli saksóknara í morgun að árásin hafi verið hrottafengin og gróf. Árásin hafi staðið yfir í klukkutíma og metur ákæruvaldið það sem svo að maðurinn hafi ekki haft möguleika á að koma sér út úr þeim aðstæðum sem hann var í á meðan árásin átti sér stað.

Refsikrafa yfir ákærðu tekur þar af leiðandi mið af því. Annars vegar fer saksóknari fram á að Ríkharð verði dæmdur í 12-18 mánaða fangelsi og hins vegar að Marteinn verði dæmdur í 12 mánaða fangelsi.



Skammaði drenginn fyrir að nota nafn hans í hótunum

Þá er Kristján Markús einnig ákærður í öðru frelsissviptingarmáli ásamt 19 ára piltunum. Í því máli er ákært fyrir sérstaklega hættulega líkamsárás gegn 18 ára dreng, ólögmæta nauðung og tilraun til fjárkúgunar. Átti árásin sér stað á heimili Sívars Bragasonar, föður Kristjáns, í Vogum á Vatnsleysuströnd.

Sá sem ráðist var á lýsti því meðal annars fyrir dómi að hann hefði verið kýldur um leið og hann kom inn. Þá hafi hann verið stunginn í lærið með óhreinni sprautunál, verið látinn drekka smjörsýru og sleikja hráka og egg af gólfinu.

Fyrir dómi sagði Kristján Markús að hafa skammað drenginn fyrir að nota nafn hans í hótunum við annan mann. Þá hefur hann játað að hafa kýlt fórnarlambið tvisvar í andlitið með krepptun hnefa en neitaði öðru sem honum er gefið að sök.



Sagði Kristján Markús hafa verið „hræðilegan”

Annar piltanna sem ákærður er ásamt Kristjáni hefur alfarið neitað sök, bæði hjá lögreglu og fyrir dómi. Hinn pilturinn viðurkenndi fyrir dómi að hafa gefið fórnarlambinu tvö rafstuð með rafbyssu og hugsanlega slegið hann utan undir eða ýtt við honum.

Saksóknari rakti svo framburð piltsins hjá lögreglu sem sagði að Kristján Markús hefði kýlt drenginn þrisvar. Þá hafi hann einnig séð þegar honum var skipað að sleikja hráka og egg.

Lýsti pilturinn því sem svo að Kristján Markús hafi verið mjög aggressívur, öskrað og bara verið „hræðilegur.” Þá hafi drengurinn sem ráðist var á verið „hrikalega hræddur.”

Í málflutningi sínum í dag sagði saksóknari að pilturinn hefði gert lítið úr þessu öllu fyrir dómi og það hafi verið augljóst að hann hafi ekkert viljað tjá sig. Engu að síður sé hægt að byggja að einhverju leyti á skýrslum hans hjá lögreglu sem séu í vissum tilfellum í samræmi við frásögn fórnarlambsins af atburðarásinni.

Fer ákæruvaldið fram á 12-18 mánaða fangelsi yfir báðum 19 ára piltunum enda séu brot þeirra gróf og hrottafengin, eins og saksóknari komst að orði.