„Duldar auglýsingar eru bannaðar“

„Mega auglýsingar vera í formi „frétta“?,“ er spurt á vefsíðu Neytendastofu. Stofnunin segir svo ekki vera, fjölmiðlar og þar með talið bloggarar verði að upplýsa um hafi verið greitt fyrir umfjöllun.

„Neytendur eiga rétt á því að vita hvenær verið er að reyna að selja þeim vöru eða þjónustu.“

Erfitt geti verið fyrir lesendur að greina á milli fyrir hvað sé greitt og hvað ekki að sögn Neytendastofu. „Margir lesendur átta sig ekki á að bloggarar fá gefins vörur eða fá greitt fyrir að fjalla um tilteknar vörur eða þjónustu. Þá getur oft verið erfitt fyrir lesendur dagblaða og tímarita að átta sig á því hvað er auglýsing og hvað er umfjöllun.“

„Duldar auglýsingar eru bannaðar hér á landi og í Evrópu. Markmiðið með því að banna slíka viðskiptahætti er fyrst og fremst að vernda neytendur. Ef neytendur átta sig ekki á þeim skilaboðum sem komið er á framfæri með markaðssetningu þá eru þeir síður í aðstöðu til þess að taka gagnrýna og upplýsta ákvörðun um viðskipti.“

Þá segir Neytendastofa að það sé óheiðarlegt að fela auglýsingar með því að birta þær sem fréttir. „Málið snýst um traust og heiðarleika. Neytandinn þarf að geta treyst því að um raunverulegar skoðanir og lýsingar á vörunni og þjónustunni sé að ræða og að þær séu ekki keyptar. Það er óheiðarlegt að dylja tilgang skilaboðanna þegar um markaðssetningu er að ræða. Þetta á sérstaklega við þegar um er að ræða áhrifagjarna neytendur eins og börn og unglinga.“

Neytendastofa hefur nú gefið út leiðbeiningar til fjölmiðla og bloggara sem finna má hér.