Líf foreldra á tækniöld ekki alltaf auðvelt

Fjöldi „læka“ á samskiptamiðlum á borð við Facebook og Instagram er oft merki um vinsældir og félagslíf. Myndir í djarfari kantinum fá oftar en ekki meiri athygli en aðrar, en slíkar myndir geta haft alvarlegar afleiðingar í för með sér. Neteinelti til að mynda en einn af hverjum tíu í 8. til 10. bekk hefur þrisvar eða oftar fengið andstyggileg skilaboð á netinu. Þetta sagði Hermann Jónsson, skólastjóri Advania-skólans, á morgunverðarfundi Advania fundi í morgun.

Dóttir Hermanns varð fyrir miklu neteinelti í grunnskóla sem meira og minna hefur markað líf hennar. Hún, ásamt föður sínum, hefur haldið fyrirlestra víða um land um þetta tiltekna málefni og hjálpað fjölmörgum sem lent hafa í sambærilegri reynslu. Málefnið er Hermanni því afar hugleikið. Eineltið í garð dótturinnar kom honum þó í opna skjöldu, en á þeim tíma gerði hann sér ekki grein fyrir því hversu stór partur af lífi ungmenna netið er.

Sjá einnig: Spornar gegn einelti með sögu sinni

Alltaf manneskja á hinum endanum

„Samskipti á netinu? Hvað er það? Fyrir mér eru þetta mannleg samskipti. Það mikilvægasta í mínum heimi er að kenna börnunum mínum mannleg samskipti, hvernig á að koma fram við fólk og tala við fólk. Það er alltaf manneskja á hinum endanum. Það er manneskja með tilfinningar,“ sagði Hermann.

Hann sagði líf foreldra á tækniöld þó langt því frá að vera auðvelt. Hvergi séu að finna leiðbeiningar, því hlutirnir væru í stöðugri þróun. Það sem sé í tísku í dag sé það hugsanlega ekki í næstu viku. Þá sé ekki hægt að leita til sinna eigin foreldra og því sé það eina í stöðunni að kynna sér hlutina. Og það hafi hann gert.

„Að vera foreldri á tækniöld, það er það sem við erum. Ef við hugsum út í þetta, þetta er svo brjálæðislegur hraði og það er svo rosalega mikið að gerast. Við sem foreldrar erum líka að alast upp. Við erum að reyna að fóta okkur í heimi sem er algjörlega nýr og er í stöðugri breytingu. Þetta gerir kröfur á okkur sem foreldrar,“ sagði Hermann en bætti við að mikilvægt sé að taka tækninni opnum örmum. Það sé margt jákvætt við hana, þó neikvæða hliðin sé vissulega til staðar.

Sjá einnig: Tilbúin að fyrirgefa

Umferðarreglurnar á netinu

„Þetta er heimurinn sem börnin eru í og ef þetta er þeirra heimur þá vil ég vera hér til að leiðbeina þeim. Þetta er eins og þegar barnið fór út í umferðina í fyrsta skipti. Þú klæddir það ekki í úlpu og sagðir því að passa sig á bílunum. Þú fórst út og kenndir umferðarreglurnar og það er þitt hlutverk sem foreldri.“

Hermann sagði að kenna þurfi börnum gagnrýna hugsun og aðstoða þau við að sjá hvað sé rétt og rangt. „Ég reyni að vera fræðandi foreldri. Ég reyni aldrei að fela hlutina fyrir börnunum mínum og segi þeim frekar inn á hvaða síður þau ættu ekki að fara, „þá sérðu eitthvað ógeðslegt,“ segi ég. Það sem streymir að þeim á ekki allt erindi við þau.“

Hann ítrekaði mikilvægi fræðslunnar og greindi frá sinni grundvallarreglu: „Þú segir ekki eitthvað sem meiðir, særir, móðgar eða lætur annarri manneskju líða illa. Þá er þetta rangt hjá þér. Þetta eru mannleg samskipti og gildir líka á netinu. Þessu megum við ekki gleyma, þetta er gríðarlega mikilvægt.“

Hermann var jafnframt í viðtali í Reykjavík síðdegis í gær, en á það má hlusta í spilaranum hér fyrir neðan. 

Saga Selmu Bjarkar, dóttur Hermanns, í Íslandi í dag.