Hvessir aftur í kvöld og í nótt

Spáð er lægðabylgju úr suðvestri og með henni hvessir heldur aftur í kvöld og í nótt. Í tilkynningu frá Vegagerðinni segir að snjómugga verði um landið vestanvert frá um klukkan 17 til 18 og síðar hríðarveður, en slydda eða bleytusnjór á láglendi. „Kuldaskil fara yfir vestanlands upp úr miðnætti og í kjölfarið frystir á láglendi og þá með éljum og hálku.“

Í tilkynningunni segir að búist sé við að viðgerð á Djúpvegi sunnan Hólmavíkur ljúki milli klukkan 20 og 22 í kvöld og verði umferð hleypt á í framhaldi af því.

„Vegir á Suður- og Vesturlandi eru að mestu greiðfærir þó er hálka á Hellisheiði og í Þrengslum.

Á Vestfjörðum er hálka og éljagangur og eitthvað um hálkubletti. Snjóþekja og skafrenningur er á Þröskuldum en hálka og skafrenningur á Gemlufallsheiði. Óveður og hálka er á Mikladal og Hálfdáni.

Vegur 61 við Skeljavík, rétt sunnan við Hólmavík er lokaður þar sem stórt skarð hefur myndast í veginn og er reiknað með að viðgerð geti tekið töluverðan tíma.

Á Vesturlandi er hálka á Bröttubrekku og hálkublettir á Holtavörðuheiði.

Vegir eru víða greiðfærir á Norðurlandi en þó er eitthvað um hálkubletti. Hálka og skafrenningur er á Öxnadalsheiði.

Á Austurlandi er víða orðið greiðfært en þó eru enn hálkublettir á stöku stað. Greiðfært er með suðausturströndinni.

Vegna vinnu í Múlagöngum má búast við umferðartöfum aðfaranótt þriðjudags og miðvikudags frá kl 21 til 06,“ segir í tilkynningunni.

Þrenging í Norðurárdal

Í tilkynningu frá lögreglu segir að vakin sé athygli á að þrenging sé á veginum á Vesturlandsvegi  Norðurárdal við Bjarnadalsá, akreinin til suðurs er lokuð vegna þrengingar. Búið er að merkja vel við þrenginguna á veginum.