Grötzki: Dagur er ótrúlega fær þjálfari

Hornamaðurinn Patrick Grötzki, leikmaður þýska landsliðsins og Rhein-Neckar Löwen, segir að það hafi verið erfitt að sætta sig við tapið gegn Katar á miðvikudagskvöld.

Grötzki lét verja frá sér í tvígang á lokamínútum leiksins en það tryggði heimamönnum endanlega sigurinn í leiknum. Hið fjölþjóðlega lið Katars hafði þó leitt allan leikinn og spilaði frábærlega í fyrri hálfleik.

Vonbrigðin eru engu að síður mikil eins og Grötzki sagði sjálfur við Vísi á hóteli þýska liðsins í Doha eftir blaðamannafund þeirra þýsku í gærmorgun.

Sjá einnig: Gensheimer: Kúðruðum góðu tækifæri

„Það er ekki einfalt að ætla að jafna sig á þessum leik á aðeins nokkrum klukkutímum,“ segir hann. „Ég verð bara að vera alveg heiðarlegur. Vonbrigðin voru gríðarlega mikil og nóttin var stutt hjá okkur öllum. En nú erum við komnir með nýtt markmið og það er stórt.“

Hann segir að liðið geti lært mikið af mistökum sínum. „Hver leikmaður fer í gegnum hvað hann hefði getað gert betur eftir svona leiki. Það er erfitt að komast yfir það og mistökin sem maður gerir. En ég held að við höfum allir öðlast mikilvæga reynslu sem mun koma okkur til góðs í framtíðinni.“

Þýskaland mætir í dag Króatíu í fyrri leik sínum í umspilinu um sæti 5-8. Umspilið skiptir miklu máli enda komast liðin sem enda í 2.-7. sæti HM í undankeppni fyrir Ólympíuleikana í Ríó 2016.

„Aðeins einn leikmaður í hópnum hefur uppilfað það að keppa á Ólympíuleikum. Við viljum ólmir komast þangað og það mun gefa okkur kraft til að ná okkur aftur á strik eftir þessi vonbrigði.“

Sjá einnig: Dagur: Erfiðari leið inn á Ólympíuleika

Hann sagði að Dagur hafði lítið sagt eftir leikinn á miðvikudag. „Það var ekki mikið en þetta voru auðvitað mikil vonbrigði fyrir hann sjálfan. Við munum funda í dag þar sem við förum stuttlega yfir leikinn en hefja undirbúning fyrir næsta leik.“

„Við megum ekki gleyma því hvað við vorum búnir að gera í þessu móti og verðum að nýta það fyrir næstu leiki. Ég held að Dagur sé með það í huga líka.“

Þýskaland náði frábærum árangri á HM fyrir tveimur árum er liðið hafnaði í fimmta sæti. En annars hefur liðið átt erfitt uppdráttar og komst það hvorki inn á Ólympíuleikana í London 2012 né heldur EM í Danmörku 2014. Í raun átti liðið ekki að vera hér í Katar eftir að liðið tapaði fyrir Póllandi í undankeppni HM í vor. En sem kunnugt er fékk Þýskaland keppnisrétt eftir að þátttökuréttur Ástralíu var afturkallaður.

Grötzki segir að Dagur, sem tók við þýska landsliðinu í sumar, hafi náð að efla sjálfstraustið í þýska landsliðshópnum á þeim tíma sem hann hefur stýrt liðinu.

„Hann hefur gefið okkur trú á okkar eigin getu. Hver leikmaður veit að hann skiptir miklu máli en að ekkert sé mikilvægara en liðsheildin. Dagur leggur mikla áherslu á það og því fær maður að kynnast á hverri einustu æfingu og í hvert sinn sem við ræðum saman. Það hefur hjálpað mikið til við sjálfstraust liðsins,“ segir hann.

Sjá einnig: Brand og Baur lofa Dag í hástert

Grötzki segir enn fremur að Dagur gefi leikmönnum líka svigrúm til að slaka á og ná áttum á milli æfinga og leikja. „Maður er mikið á hótelinu með leikmönnum og því er mjög gott að fá tíma út af fyrir sjálfan sig líka inn á milli. Dagur hefur náð að finna þetta jafnvægi sem þarf til.“

Þýskaland og Danmörk munu halda HM árið 2019 og hefur Degi það hlutverk nú að byggja upp lið sem getur orðið heimsmeistari á heimavelli. Miðað við frammistöðu liðsins á HM í Katar virðist liðið komið vel á veg en Grötzki efast ekki um að Dagur sé rétti maðurinn í verkið.

„Hann er í fyrsta lagi ótrúlega góður þjálfari og hagar undirbúnigi sínum leiki afar vandlega. Þess fyrir utan hefur hver einasta stund á mótinu verið þaulhugsuð og undirbúin. Það hefur gert okkur kleift að standa okkur þegar á reynir.“

„Ég er hundrað prósent viss um að hann sé rétti maðurinn til að leiða okkur áfram næstu árin.“